İranda davam edən etiraz aksiyalarının fonunda Qərb islam ölkəsi ilə bağlı kartlarını yavaş – yavaş açmağa başlayıb. 

Hazırda ən çox iddia olunan məsələlərdən biri də Qərbin Rza Pəhləvini İranda hakimiyyətə gətirməkdə maraqlı olmasıdır.

Aprelin 17-də Rza Pəhləvinin İsrailə səfəri iddiaları daha da alovlandırıb.  

Məsələ ilə bağlı Ednews-a danışan israilli politoloq, “Qüdsün əli” ictimai təşkilatının rəhbəri Barux Leviev bildirib ki, Rza Pəhləvinin İsrailə gəlməsi İran tərəfdən müsbət qarşılanmayıb.

“Rza Pəhləvinin səfəri, əlbəttə ki, bizim üçün çox əlamətdardır. Çünki belə bir hörmətli şəxs dövlətimizə səfər edib, xüsusilə də Holokost qurbanlarının anım günündə. Bu, yəhudi mədəniyyətinə və tarixinə böyük hörmət nümayişidir”.

B.Leviyevin  sözlərinə görə, ümumilikdə səfər onun İranda insan hüquqlarının pozulması məsələsini gündəmə gətirməsi ilə bağlı beynəlxalq mövqeyini gücləndirməyə kömək edir:

“Rza Pəhləvi İrandakı hazırkı rejimi dəstəkləmir və buna məcbur olub ABŞ-a köç edib. O, dinə qarşı deyil, dinlə hakimiyyətin ayrılması tərəfdarıdır. Buna görə, həqiqətən də İran İslam Respublikasında olan mövcud rejimi devirmək lazımdır.  Bunun üçün beynəlxalq arenada statusunu gücləndirməliyik”.

B.Leviyevin fikrincə, bu səfərin gizli motivləri ABŞ-ın İrana qarşı kəskin addımlar atmağa, bununla da Rza Pəhləvinin özünün simasında İrandakı mövcud rejimə alternativ nümayiş etdirməyə hazır olduğuna işarə edən amil ola bilər. 

"O, əlaqələr qurmağa İsrailin və Qərbin dəstəyini almağa və bizə hələ məlum olmayan gələcək planları üçün statusunu yüksəltməyə çalışır".

Aysel Şahmar