“Hər bir terrorçu təşkilat keçirdiyi akt zamanı xüsusi imzalar qoyur və bu imza terrorun hansı qruplaşma tərəfindən edilməsini göstərir. Peşəkar tədqiqatçılar bunu dərhal bilirlər”.
Ednews xəbər verir ki, bu fikirləri tanınmış tarixçi alim, dosent Zaur Əliyev GünazTv-nin rəhbəri güneyli siyasi fəal Əhməd Obalı və oğlu Dəniz Obalıya qarşı törədilmiş terror aktı ilə bağlı bildirib.
Feysbuk hesabında etdiyi paylaşımda Əhməd Obalı və oğlu Dəniz Obalıya qarşı edilmiş sui-qəsdin detallarına toxunan tarixçi alim qeyd edib ki, hər bir terrorçu təşkilatın hədəf aldığı şəxsləri öldürmək üçün özünəməxsus metodu var. Z.Əliyev bildirib ki, güneyli soydaşlarımıza qarşı hücum aktı bir neçə cəbhədən gələ bilərdi:
“Amerikada yaşayan və GünazTv-nin rəhbəri Əhməd Obalı və oğlu Dəniz çox amansız şəkildə döyülüblər. Xəbərlərdən oxuduğumuz qədərilə onun boynunu qırmaq istəyiblər, bunu edə bilməyəndə barmaqlarını sındırıblar. Bu terror üsulu Şərqdə, xüsusilə ərəb və farslarda, bir də erməni terror təşkilatı olan Asala-da yayılıb. Hər bir terrorçu təşkilat keçirdiyi akt zamanı xüsusi imzalar qoyur və bu imza terrorun hansı qruplaşma tərəfindən edilməsini göstərir. Peşəkar tədqiqatçılar bunu dərhal bilirlər. Misal üçün, İtaliya mafiyasının imzası ürəyə saplanan bıçaq, rus mafiyasının imzası kürək hissədən vurulan bıçaq zərbəsi, yapon mafiyasının imzası qılıncla başın kəsilməsi, İsrail mafiyasının imzası partlayış və sairədir. Amerikada hazırda Aslanın ən böyük qanadı olan "Erməni gücü" mafiyasının imzası suda boğmaqdır. Türk mafiyasının imzası ürəyə vurulan tək güllədir”.
Z.Əliyev Əhməd Obalıya qarşı törədilən hücumda SEPAH–İnqilab Keşikçiləri Ordusunun xüsusi təyinatlı “Qüds Qüvvələri” –nin əli olmasını da istisna etməyib:
“Qüds Qüvvələri” dünyada terror aktları planlayan və həyata keçirən təşkilat kimi tanınır. O öz fəaliyyətində həmçinin, Livanda Hizbullah, Fələstində İslami Cihad, Bəhreyndə əl-Əştər Briqadaları, İraqda Kataib Hizbullah kimi terrorçu təşkilatların fəaliyyətindən yararlanır. Bu terror üsulu xəbərdarlıq növü kimi qəbul edilir. Boynun qırılması ilə terrorçu demək istəyir ki, əsas hədəf yerləriniz, mühüm şəhər və obyektləriniz nəzarətimiz altındadır və istənilən zaman orada terror törədə bilərik”.
Törə Zeynal