“Fransa özünü bu regionda əsas söz sahibi, Avropa oyunçusu kimi qələmə vermək istəyir. O sadəcə olaraq Rusiyanı kənarlaşdırmaq məqsədi daşıyan siyasət aparır. Fransanın Ermənistanla hərbi texniki əməkdaşlığı bu məqsədlər üzərində qurulub. Amma iş orasındadır ki, bu  o qədər də geniş miqyasda baş verə bilməz”. 

Bu fikirləri Ednews-a açıqlamasında politoloq Fikrət Sadıqov “Ermənistan rəhbərliyi həm sülhə hazır olduğunu bəyan edir, həm də Fransa və Hindistandan silah alır” sualına cavab verərkən bildirib. O, qeyd edib ki, Ermənistanın bütün silahları, indiki hərbi texnikası Rusiyanındır.

“Bu əslində reallığı nəzərə almayan bir addımdır. Hindistanın isə öz məqsədləri var. Onlar sadəcə olaraq Azərbaycanın Pakistanla yaxınlaşmasına qıcıqla yanaşır. Görünür, bu bu kontekstdə öz addımlarını atmaq fikrindədir. Hindistanın guya Ermənistanı müdafiə etməsi Pakistan-Azərbaycan alyansına qarşı yönələn addımlardır. Ancaq reallıq odur ki, Ermənistana heç kəs hədə-qorxu gəlmir, təhlükə yaratmır. Nə Azərbaycan, nə də Türkiyə. 

Politoloq qeyd etdi ki, bizim rəsmilərimiz bunu dəfələrlə deyib. 

“Çünki bizim əsas məqsədimiz öz torpaqlarımızı azad etməkdir. Başqa bir məqam da var. Maliyyə mənbəyi hardan tapılacaq? Haradan istifadə ediləcək? Ermənistanın o qədər də maliyyəsi yoxdur. Və onun öz daxilində çox ciddi problemləri var. Diaspora da axır vaxtlar nəyəsə pul, investisiya yatıranda çox praktiki məqsədlər güdür. Düşünmürəm ki, iki ölkə arasındakı bu əməkdaşlıq geniş və böyük miqyaslı layihə olacaq”. 

Oğuz