Rusiyanın Ermənistandakı səfirliyi 102 saylı hərbi bazanın regionun təhlükəsizliyi üçün önəm daşıdığını vurğulayıb. Bundan başqa Ermənistanın mövcud vəziyyətdə Rusiyadan başqa iqtisadi tərəfdaşı olmadığı da bildirilib.
Ermənistan bu vəziyyətdə Rusiya ağalığından çıxa bilər?
“Məhz Qərbin sifarişi ilə Paşinyan iqtidarı Qarabağ ətrafindakı proseslərdə Rusiya sülhməramlılarının öz vəzifələrini yerinə yetirməmələri, Azərbaycana tərəfkeşlik etmələri kimi cəfəng bəyənatlar verərək Azərbaycanla hərbi, diplomatik qarşıdurmada məğlubiyyətlərinə görə məsuliyyət yükünu Rusiyanin üzərinə yıxmaqla onun regiona təsir imkanlarını azaltmaq istəyirlər”.
Bu fikirləri Ednews-a açıqlamasında siyasi ekspert Elşən Manafov bildirib. Onun sözlərinə görə Ermənistanın məğlubiyyətə görə KTMT-ni günahlandırması təşkilatı tərk etməyə hesablanıb:
“Hazırda Ermənistan rəhbərliyi Qərb qarşısında əvvəlki zamanlarda götürdüyü öhdəliklərə rəğmən regionun geosiyasi konfiqurasiyasının dəyişdirilməsi istiqamətində addımlar atır. Regionda geosiyasi durum isə, Azərbaycan Silahlı Qüvvələrinin 2020-ci ildə Ermənistan üzərində əldə etdiyi qələbədən sonra dəyişib. Münaqişə tərəflərinin razılığı ilə bölgəyə Rusiyanin sülhməramlılarından ibarət hərbi kontingentin yerləşdirilməsi Qərbi narazı salıb.
Məğlubiyyətə görə KTMT-ni günahlandırmaq da, əslində bu məqsədə, eyni zamanda Ermənistanın bu blokdan çıxması ilə onun regiondan uzaqlaşdırılmasına hesablanıb”.
Ermənistan Rusiyanın dəstəyi olmadan öz problemlərini həll edə bilməz:
“Rusiyanin Ermənistandaki hərbi bazası rəsmi İrəvanla zamanında razılaşdırılmış müqaviləyə görə burada yerləşdirilib, onun Gümrüdə dislokasiya müddəti 2045-ci ildə başa çatır.
Rusiya tərəfi əldə edilmiş razılığa əməl edirsə, Ermənistanın bu bazanın vaxtından əvvəl, birtərəfli şəkildə çıxarılmasi ilə bağlı tələbləri beynəlxalq qanunvericiliyə uyğun addım deyil.
Digər tərəfdən hazırki şəraitdə Ermənistanın Rusiya ilə əməkdaşlıqdan imtina etməsi onun enerji təhlükəsizliyi, infrastruktur və nəqliyyat sahəsində Rusiyanın monopolist mövqeyi və s. baxımdan məqbul sayıla bilməz. Ermənistan coğrafi durumuna görə, ABŞ və Avropa İttifaqından uzaqda yerləşir. Rusiyanin dəstəyi olmadan ölkə yaxın perspektivdə bu problemləri həll etmək iqtidarında deyil.
Ən nəhayətdə, rəsmi İrəvan regionun təhlükəsizlik problemlərinin həllinə dair Azərbaycan prezidenti İ.Əliyevin 3+3 formatında əməkdaşlıq təkliflərini müsbət qiymətləndirdiyi halda, regiona birbaşa aidiyyatı olmayan ABŞ və Aİ-ni israrla bura nizamsalma proseslərinə cəlb etməklə digər region dövlətlərinin təhlükəsizlik maraqlarını təhdid etmiş olur”.
Fərid Axund