Xəbər verdiyimiz kimi bu gün dünya Qəzza müharibəsinin dayandırılacağı ilə bağlı Beynəlxalq Ədalət Məhkəməsinin qərarını gözləyir. Bəs qərarın hökmlülüyü müharibəyə nə qədər təsir edə bilər?

Mövzu ilə bağlı Ednews – a danışan fələstinli jurnalist Xəlil Əl-Əsali bu qərarın müharibə gedişatına təsir etməyəcəyini vurğulayıb:

“Əslində bu gün Beynəlxalq Ədalət Məhkəməsi Qəzzada müharibənin dayandırılması ilə bağlı qərar verməyəcək, ancaq məhkəmə tərəfindən müharibənin dayandırılması üçün çağırış olacaq, lakin İsrail bunu qəbul etməyəcək”.

Bunun səbəbini açıqlayan jurnalist bildirib ki, İsrail rəsmiləri bu məhkəmənin dəyərini aşağı qiymətləndirirlər, ona görə də İsrail Qəzza zolağında müharibəni dayandırmayacaq və hələlik geri çəkilməyəcək.

“İsrail ABŞ və Avropa vasitəsilə Ədalət Məhkəməsinin rolunu zəiflətməyə və aldığı qərarların əhəmiyyətini azaltmağa çalışır. Ədalət Məhkəməsi tərəfindən müharibənin dayandırılması çağırışı edilərsə, İsrailin daxili və xarici böhranını dərinləşdirəcək, xüsusən də nəzərə alsaq ki, İsrail hazırda özünütəcriddən əziyyət çəkir. İsrail xalqına gəlincə isə hökuməti mümkün qədər tez devirmək üçün çağırışlar var. Çünki hamıya aydın oldu ki, indiki sağçı İsrail hökuməti öz ekstremist planını Qəzzadakı israilli girovları və ya dünya ictimai rəyini nəzərə almadan, daha böyük İsrail ideyasını nəzərə alaraq  öz planını həyata keçirməyə çalışır”. 

Loğman Yunis