ABŞ Prezidenti Co Bayden bəşəriyyətin Üçüncü Dünya Müharibəsinə yaxın olduğunu açıqladı. Təkcə ABŞ yox, bir çox Avropa lideri də bu düşüncədədir. Hətta Türkiyə Müdafiə Nazirliyi ölkənin belə bir qlobal savaşa hazır olduğunu bəyan etdi. İddialara nə dərəcədə inanmaq olar? Böyük savaş hansı bölgə və ya gərginlik ətrafında başlaya bilər? Cənubi Qafqaz belə bir savaşda hansı mövqedə ola bilər?
Mövzu ilə bağlı Ednews-a açıqlamasında politoloq Əlimusa İbrahimov bildirdi ki, bu vaxta qədər müxtəlif dövlət başçıları və siyasi xadimlərdən bu xəbərdarlığı eşitmişdik:
“Baydenin də bu mövzu barədə ciddi danışması gəlməkdə olan təhlükənin qarşısını ala biləcəkmi? Bəşəriyyət yeni dünya müharibəsinin acınacaqlı nəticələri ilə üz-üzə qalmayacaq ki? Maraqlı olan budur ki, dünya dövlətləri III Dünya Müharibəsini məhz ABŞ və Rusiyanın bir-birinə qarşı həyata keçirilməsi mümkün olmayan şərtlər irəli sürməsi nəticəsində baş verəcəyini düşünürlər. Belə olan halda əgər baş verə biləcək yeni dünya müharibəsinin səbəbkarı ABŞ olacaqsa, onun prezidenti kimi və bu müharibə ilə qorxudur?
Rusiya-Ukrayna müharibəsinin başlanması ilə III Dünya Müharibəsinin başlanması və ya bu müharibənin elə üçüncü dünya müharibəsi olması ilə əlaqədar mütəxəssislərin fikirləri haçalanırdı. Rusiyaya qarşı dayanan az qala dünyanın ən inkişaf etmiş ölkələri dünya ictimaiyyətini üçüncü dünya müharibəsi ilə hədələyir və neytral qalan ölkələri Rusiyaya qarşı onların yanında mövqe tutmağa təhrik edirdilər. Onların hesablamalarına görə üçüncü dünya müharibəsi başlasa heç bir ölkənin ondan xilası olmayacaq. Bununla ABŞ və Avropa İttifaqı ölkələri üçüncü dünya müharibəsini nüvə silahının istifadə olunacağı qlobal müharibə ilə eyniləşdirirdilər. Deməli, Nüvə silahının ilk atəşlənməsi ilə üçüncü dünya müharibəsi də başlayacaq. Bu iddianın tərəfdarlarının fikrincə mövcud olan iki yüz dövlətin hamısı müxtəlif cəbhələrdə bir-biri ilə müharibə aparsa da bu nüvə silahı daşıyan qitlərarası və ballistik raketlər havaya qalxmayınca bu müharibələri üçüncü dünya müharibəsi kimi səciyyələndirmək olmaz”.
Politoloq qeyd etdi ki, bu iddianın əksini sübut etməyə çalışanlar, düşünürlər ki, 1-ci və 2-ci dünya müharibələrinin başlanması və gedişini diqqətlə nəzərdən keçirdikdə Rusiya ilə Ukrayna müharibəsinin onunla eyni səciyyəyə malik olduğunu müşahidə etməmək mümkün deyil:
“Dünya müharibələri bir-birinə qarşı duran dövlətləri dünyadakı nüfuz və ərazi uğrunda apardıqları müharibələr hesab olunursa bəs Rusiya-Ukrayna müharibəsi nədir? Burada da məhz nüfuz və dünyanın yenidən bölüşdürülməsi uğrunda ciddi qırğın gedir. Rusiyanın Ukraynaya qarşı apardığı hərbi əməliyyatları müharibəadlandırmaqdan çəkinməsi heç də onun müharibə kimi təsvir edilməsinin qarşısını almır.
Hesab edirəm ki, Rusiya ilə Ukrayna arasında gedən müharibə və Yaxın Şərqdə baş verən hadisələr elə üçüncü dünya müharibəsinin artıq başlandığının sübutudur. Sadəcə ABŞ və Qərb Rusiyaya qarşı əsgər çıxarmadıqlarını əsas götürərək gedən müharibələri dünya müharibəsinin tərkib hissəsi adlandırmaqdan çəkinir və bununla Rusiyaya xəbərdarlıq edirlər ki. dünya müharibəsi başlayarsa onun vəziyyəti daha ağır olacaq. Başda ABŞ olmaqla NATO üzvləri və onun təəssübkeşlərindən olan antirusiya koalisiyası axıra qədər nüvə silahından istifadə olunmasa hərbi əməliyyatlar bitənə qədər bu müharibəni dünya müharibəsi aparmaqdan qaçacaq. Bununla da o dünya dövlətlərini üçüncü dünya müharibəsi kabusu və nüvə müharibəsi ilə təhdid edəcək. Amma tarix və onu yazanlar siyasətçilərdən tam fərqli fikirdədirlər və biz bunu artıq ortaya qoyulan tarixi tədqiqatlarda görürük.
Böyük dövlətlərin həm Rusiya-Ukrayna müharibəsi, həm də Yaxın Şərqdə gedən qırğını dayandıra bilməmələrinə gəlincə onlar bu istiqamətin tələb olunan addımların heç də hamısını atmırlar və bəzən adama elə gəlir ki, onlar məhz müharibənin və qırğınların davam etdirilməsində daha çox maraqlıdırlar. Müharibə dayandırıla və daha ciddi fəsadların baş verməsinin qarşısı alına bilər. Sadəcə onu başlayan və ya başlatdıranlar bunu istəsə. Müharibə həqiqətən o vaxta qədər davam edəcək ki, müdaxilə edən dövlətlər öz maraqları mövcudluqları üçün üçün təhlükə hiss etsinlər”.
Oğuz
