İranda keçirilmiş prezident seçkisində qalib müəyyənləşmədi. Ölkənin 9-cu prezidenti iyulun 5-də, ikinci turda seçiləcək. İran Mərkəzi Seçki Komissiyasının (MSK) məlumatına əsasən, Məsud Pezeşkian səslərin 43 faizini, Səid Cəlili isə 38 faiz səs toplayıb. İkinci turda mübarizə bu iki namizəd arasında gedəcək.

Pezeşkian yoxsa Cəlili? Azərbaycan üçün kimin prezidentliyi məqbuldur?

Məsələ ilə bağlı Ednews-a danışan siyasi şərhçi Sədrəddin Soltan İran dövlətinin fəaliyyət prinsipinin əsasən Ali rəhbərdən asılı olduğunu bildirib:

“İran konstitusiyasına əsasən, ölkənin başında Ali rəhbər dayanır. Ali rəhbəri isə Ali Dini Ekspertlər Şurası seçir. Bu il martın 1-də seçkilər keçirilib. Prezident isə ölkədə ikinci rəsmi şəxs sayılır. Başqa sözlə prezident icraedici orqandır, yəni hökümətin rəhbəridir. Buna görə də prezidentin müstəqil xarici siyasət etməsi və yaxud siyasət yürütməklə bağlı özünün hər hansı proqramını irəli sürmək kimi imkanı yoxdur. Bütün siyasi planlar dövlət başçısı Xamenei ilə razılaşdırılmalıdır. Ondan sonra siyasət reallaşır.”

Ekspert bildirib ki, İranda kimin prezident seçilməsi xarici siyasətə təsir etmir:

“Bu baxımdan seçiləcək butün rəhbərlərin siyasi yönləri yalnız və yalnız Xameneyin cızdığı xətt üzrə aparıla bilər. Ola bilər ki, dar çərçivədə prezident öz fikirlərini dövlət başçısı ilə bölüşsün, lakin son qərarı Ali rəhbər verir. Əgər prezident Azəraycanla əlaqələri normallaşdırmaq yönündə siyasət aparmaq istəyirsə, bu qərar Ali rəhbərin razılığı ilə aparılmalıdır. Ona görə də kimin hakimiyyətə gəlməsi o qədər də əhəmiyyət daşımır.”

Fərid Axund