Son zamanlar orta təhsil müəssisələrində şagirdlərin davranış qaydaları müzakirə obyektinə çevrilib. Demək olar hər gün, sosial mediada sinifdə özünü idarə edə bilməyən uşaqların görüntüləri paylaşılır, tənqid edilir, müxtəlif həll yolları irəli sürülür.
Orta məktəblərdə şagird özbaşınalığına son qoymaq üçün yeni bir qayda hazırlanır. Belə ki, şagirdlərin psixoloji pasportları hazırlanacaq.
Maraqlıdır, yeni mexanizm necə hazırlanacaq? Psixoloji pasportla şagirdlərin psixoloji durumu necə nəzarətdə saxlanılacaq?
Mövzu ilə bağlı Ednews-a açıqlamasında psixoloq Nuriyyə Quliyeva bildirib ki, son dövrlərdə uşaqlarda həddindən artıq psixoloji problem yaranıb. İstər aşağı yaş qrupları, istərsə də yuxarı yaş qrupları olsun.
“Bununla bağlı valideynlər daha ciddi addım atmalıdırlar. Xarici ölkələrdə uşaqlar ilin əvvəli və sonunda psixoloji testlərdən keçirlər. Bu onların yararınadır. Çünki hər hansısa bir problem aşkarlandıqda onu həll etmək daha asan olur. Bu pasportlar həm valideynlər baxımından onlara böyük informasiya verəcək, həm də şagirdlərin özü üçündə, mövcud vəziyyətləri ilə bağlı problemlər aşkarlanıb aradan qaldırılacaqdır”.
Həmçinin o qeyd edib ki, pasportların hazırlanması şagirdin başqa məktəbə keçməsi zamanı yeni məktəbin şagirdi daha yaxşı tanımasına yol açacaq.
Təhsil Eksperti Elşən Qafarov isə hər bir məktəbdə şagirdin psixoloji pasportunun zəruri olduğunu bildirib.
“Bu psixoloji pasport məktəbin psixoloqu nəzarəti altında sinif rəhbərləri tərəfindən hazırlanmalıdır. Bu pasportlarda şagirdin xarakteri, davranışı və s. kimi qeydlər əks olunur. Bunlar hər ayın sonunda müəllimin qənaətə gəldiyi qeydlərdir. Məsələn, şagirdin psixoloji xüsusiyyətlərində hansı irəliləyişlər olub. Bizim məktəblərimizdə psixoloji xidmət artıq 25 ilə yaxındır ki, tətbiq olunmağa başlayıb. Və bu psixoloji xidmətin əsəs tələblərindən biri də məktəbdə hər bir şagirdin psixoloji pasportunun olmasıdır. Bu pasportlarda şagirdin bütün tədris boyu ərzində aylar, həftələr üzrə davranışı və s. qeydə alınmalıdır.”
Vəfa Ustayeva
