Bu gün bir sıra saytlarda Prezidentin təsdiq etdiyi Nazirlər kabinetinin yeni tərkibində yer almayan Diasporla İş üzrə Dövlət Komitəsinin sədri Nazim İbrahimovun qızının toyunun növbədənkənar Prezident seçkilərindən dolayı təxirə salınması ilə bağlı məlumat yayılıb.
Xəbərdə ötən ilin dekabrında nişanlanan Kəmalə İbrahimovanın toy tarixinin bu il aprel ayının 14-ə təyin edildiyi, hətda dəvətnamələrin də paylandığı qeyd olunurdu. Mənbənin verdiyi məlumata görə, toyu təxirə salan tərəf İbrahimovlar olub. Buna səbəb isə N. İbrahimovun seçkilərdən sonra formalaşdırılacaq yeni kabinetdə yer almayacağı barədə xəbərlər alması olub.
Yayılan xəbərlə bağlı Bizim Yol Diasporla İş üzrə Dövlət Komitəsinin sədri Nazim İbrahimovun qardaşı, “ATV” telekanalının keçmiş prezidenti, toyu olacaq Kəmalə İbrahimovanın əmisi Tağı İbrahimovla əlaqə saxlayıb.Tağı İbrahimov saytımıza açıqlamasında məlumatın yalan, cəfəngiyat olduğunu bildirib.
“Bu xəbəri kim ötürüb, kim yayıb bilmirəm. Görünür bizi istəməyən insanlar yayıb. Toyun prezident seçkilərinə nə aidiyyatı var. Biz orda olan şəraitdən xoşumuz gəlmədiyi üçün yeri dəyişmişik. Toy əvvəlcədən müəyyən edildiyi kimi may ayının 5-də keçiriləcək. Başqa oteldə, daha yaxşı şəraiti olan oteldə keçiriləcək.”
“Qaldı ki, Prezidentin təyinatlarını kim bilir ki, əvvəlcədən də nəsə hazırlıq görsün. Bunlar bir qrup şəxsin işidi. Belə məlumatları yayırlar. Nazimin Nazirlər kabinetinin yeni tərkibində yer alıb almayacağını kim bilirdi ki, ona görə də toyu təxirə salaq. Bunlar yalan, uydurma kimisə qaralamaq kampaniyasıdır.”
Qeyd edək ki, Azərbaycanda növbədənkənar prezident seçkilərindən sonra Prezident İlham Əliyevin sərəncamı ilə N. İbrahimovun yerinə deputat Fuad Muradov təyin edilib.
x x x
Diasporla İş üzrə Dövlət Komitəsinin keçmiş sədri Nazim İbrahimov qızının toyunu təxirə salıb.
Bakupost-un məlumatına görə, ötən ilin dekabrında nişanlanan Kəmalə İbrahimovanın toyu aprelin 14-də baş tutmalıymış. Hətta toyun məkanı danışılıb, dəvətnamələr də paylanılıbmış. Belə ki, toyun keçiriləcəyi məkan olaraq "Alov qüllələri”ndəki "Fairmont” otellə razılıq əldə olunub, təşkilati işlər də tamamlanıb. Lakin növbədənkənar prezident seçkilərindən sonra toy təxirə salınıb. Qonaqlara isə səbəb kimi prezident seçkilərindən sonra tədbirlərin çox olduğu, məhz bu səbəbdən toyun başqa tarixə keçirildiyi deyilib.
Mənbənin verdiyi məlumata görə, toyu təxirə salan tərəf İbrahimovlar olub. Buna səbəb isə N. İbrahimovun seçkilərdən sonra formalaşdırılacaq yeni kabinetdə yer almayacağı barədə xəbərlər alması olub.
Bundan başqa, toyun keçiriləcəyi məkan üçün və təşkilati işlərə xeyli miqdarda pul xərclənilib.
Qeyd edək ki, K.İbrahimova "DeCamie” moda evinin sahibidir.
Azərbaycanda növbədənkənar prezident seçkiləri aprelin 11-də baş tutub. Seçkilərdən sonra aprelin 18-də Nazirlər Kabineti tam tərkibdə istefaya göndərilib. Prezident İlham Əliyevin sərəncamı ilə N. İbrahimovun yerinə deputat Fuad Muradov təyin edilib. Beləliklə, N. İbrahimov NK-dan uzaqlaşdırılıb.
