"Eldar Həsənov vəzifəsindən getdikdən sonra işdən çıxarılan müstəntiq və prokuroru böyütdülər" | Eurasia Diary - ednews.net

19 Noyabr, Çərşənbə axşamı


"Eldar Həsənov vəzifəsindən getdikdən sonra işdən çıxarılan müstəntiq və prokuroru böyütdülər"

Cəmiyyət A- A A+

(əvvəli burada)

"İş hələ birinci müstəntiqdə olarkən iki nəfərin təsvirlərini bildiyim üçün müstəntiqdən onlar barəsində soruşmuşdum. Müstəntiq isə bildirmişdi ki, o şəxslər ümumiyyətlə Azərbaycanda olmayıblar, Leninqradda olublar. İş götürüldükdən sonra valideyinlərə tapşırdım ki, həmin iki şəxs barədə, hadisə olan vaxt onların Azərbaycanda olub olmaması barədə məlumat toplayın, o ərazidə yas mərasimlərinin, toy mərasimlərinin olub olmaması, həmin şəxslərin o mərasimlərdə işltirakı barədə informasiya əldə edin. Amma elə edin ki, heç kim şübhələnməsin. Hadisə baş verən vaxt ətraf ərazidə olan avtomobil dayanacaqlarının mağazaların işçiləri ilə söhbət edin. Hadisəni xatırlayan kimi edin şübhələnməsinlər.

İki gün sonra ilk ciddi məlumat əldə etdik. Ana və uşaq öldürülən gün iki nəfər avtodayanacağın yanında olan krantda əllərində və üstlərində olan qan ləkələrini yuyublar. Mühafizəçiyə isə bildiriblər ki, toyda dava düşüb dalaşıblar. Burunlarının qanı olub. Müstəntiqlə əlaqə saxlayıb hadisə olan gecə toy olması dava düşməsi barədə məlumat toplamasını xahiş etdim. Bir neçə gün sonra müstəntiq dedi ki həmin gün toy mərasimi olması və kütləvi dava olması müəyyən edilmədi. Artıq ilk sap əlimizdə.Təxminən bir həftə sonra isə məlumat daxil oldu ki, o şəxslər haisədən iki gün qabaq yas yerində olub 10 manat pul yazdırıblar. Biri isə hadisədən sonra da bir yas yerində olub.

Artıq müstəntiqin Leninqrad söhbəti tam iflasa uğradı. Müstəntiqlə danışıb həmin siyahıları götürməsini xahiş etdim. Sonra valideyinlərə tapşırdım ki, öldürülən ana və balanın qaldığı evlə üz-üzə olan evdə yaşayan müəllimlə söhbət etsinlər. Amma uşaqlarının tutulduğunu bildirməsinlər. Bir neçə gün sonra Adilin atası iş yerimə gəldi. Dedi ki, tapdıq. Müəllim həmin gecə o evə gələnləri görüb. Birini üzdən tanıyır, o birinin əlamətlərini deyir. Əlamətləri dedi. Vəsatətimə baxdım əlamətlər eyni. Dedim müəllimlə bir də təsadüfən güy görüş dəqiqləşdir yanılmayaq. Amma heç kimə heç nə demə. Tələsmə şübhələnməsin. Bir neçə gün sonra kişi uça-uça gəldi. Çox sevinirdi. Dedi danışdım. Səsini də yazdırdım. Qulaq asdım. Sonra müstəntiqlə danışdım. Məlumatları təqdim etdik. Təxminən 5-6 gün sonra müstəntiq zəng etdi. Dedi Osman müəllim muştuluq. Qızılları tapdıq. Dedim nə qızıllar. Dedi öldürülən qadının qızıllarını. Dedim necə. Dedi 1-2 saat gözlə yaxşı məlumatım olacaq. Səhərisi gün isə məlum oldu ki, həmin şəxslər tutulub. Ana və balanı necə öldürdüklərini, evdən götürdükləri qızılların yerini deyiblər. Video çəkilişlə onlardan birinin xalasının həyətindəki tut ağacının dibindən qızıllar götürülüb.

Bir gün sonra uşaqlar həbsdən azad edildi. Səhərisi gün axşamtərəfi yaşadığım həyətdə qonşularla söhbət edərkən valideyinlər gəldi. Yanlarında yaraşıqlı bir xanım da var idi. Mənə çatmağa bir neçə addım qalmış həmin xanım diz üstə oturub sürünə sürünə mənə tərəf gəldi. Çaşdım. Əlini atıb saçını yoldu. Ayağıma atdı. Əlindən tutub qaldırdım. Dedim ay bacım siz neyləyirsiniz. Bu nə demək. Dedi ki, Adil mənim qardaşımın tək balası. Əhd etmişdim ki, kim ona kömək etsə onun qarşısında dizin dizin sürünəcəm. Qonşular da çaşmışdı. Çox mütəssür olmuşdular. Sonra Adilin anası dedi ki, məni tanımadınızmı. Dedim vallah tanış gəlirsiniz. Amma xatırlaya bilmirəm. Dedi 1991-ci ildə atamı şərləmişdilər. Siz azad etdirdiniz. Dedim hə yadıma düşdü. Aradan çıxdınız. Hamı güldü. Dedi o vaxt verəcəyim şirinliyi də indi verəcəm. Sizin o vaxt etdiyinizi əvəzsiz qoymuşduq. Ona gırə bu başımıza gəldi. Dedim halalınız olsun. Həmin iş üzrə müstəntiq və prokuror vəzifələrindən kənarlaşdırıldılar. Lakin Eldar Həsənov vəzifəsindən getdikdən sonra onları böyütdülər".

Vəkil Osman Kazımov

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...