Dünən Niderland Krallığının Rotterdam şəhərində Benelüks Azərbaycanlıları Konqresinin (BAK) təşkilatçılığı ilə “Qarabağ” Sport Klubunun ofisində bütün diaspora təşkilatları bir araya gələrək toplantı keçiriblər. Toplantıda Niderland və Belçika Azərbaycanlıları Koordinasiya Şurasına üzv olan bütün təşkilatlar, eləcə də Hollanda-Azərbaycan Türk Kültür Dərnəyinin nümayəndələri iştirak ediblər.
Niderlandda fəaliyyət göstərən diaspora təşkilatlarının bir araya gətirən səbəb isə 12 iyulda Ermənistan hərbi qüvvələrinin qəfildən Tovuz istiqamətindən Azərbaycan sərhəddini pozaraq hücuma keçməsi olub.
İclası ev sahibi kimi BAK-ın rəhbəri Elsevər Məmmədov açaraq öncə Tovuz döyüşlərində həlak olan şəhidlərimizin ruhunu 1 dəqiqəlik sükutla yad etməyi xahiş etdi və hər kəsə bura gələrək birlik nümayiş etdirdikləri üçün təşəkkürünü bildirdi: “Bildiyiniz kimi, 12 iyulda vətənimiz yenə də qəfil düşmən hücumuna məruz qalıb və bu xəbəri eşidəndən təbii ki, xaricdə yaşayan bütün soydaşlarımız narahatlıq içərisindədir. Hər kəsin qəlbi vətənlə döyünür, hər birimiz uzaqdan da olsa, nəsə etmək istəyirik, dövlətimizə, ordumuza, əsgərlərimizə dəstək olmaq üçün yollar axtarırıq. Buraya toplanmaqda da məqsədimiz bu ağır günlərdə tək-tək deyil, məqsədyönlü və təşkikatlanmış formada addımlar atmaq haqqında planlar qurmaqdır”.
Sonra Niderland-Belçika Azərbaycanlıları Koordinasiya Şurasının əlaqələndiricilərindən biri Mayisə Ağamirzəyeva çıxış edərək mənfur düşmənin gözlənilmədən törədilən təcavüzünü pisləyərək bildirib ki, bu düşmənin ölkəmizə ilk qəfil həmləsi deyil: “Dəfələrlə erməni hərbi hissələrinin hücumuna məruz qalan Azərbaycan ordusu hər dəfə bu ağır sınaqlardan üzüağ çıxıb. Hələ bir neçə il öncə aprel döyüşlərində ermənilərə layiqincə dərs verilsə də, təəssüf ki, bundan nəticə çıxarmadılar. Bütün dünyanın Covid-19 pandemiyası ilə mübarizə apardığı bir günlərdə ermənilərin atdığı bu addım isə heç bir insanlığa sığmır. Biz Azərbaycan diasporası təşkilatları da bu erməni vəhşiliyini bütün dünyaya çatdırmaq üçün əlimizdən gələni etməliyik. Bu gün birlik günüdür, bu gün biz də “Biz səninləyik Azərbaycan, qəlbimiz vətənlə döyünür!” deməyə toplaşmışıq”.
Hollanda-Azərbaycan Türk Küktür Dərnəyinin başkanı İlhan Aşkın da çıxış edərək öncəliklə şəhidlərimizə Allahdan rəhmət, yaralı əsgərlərimizə isə şəfa dilədi. Azərbaycan xalqının ağrı-acılarının həm də bütün türk xalqlarının və Türkiyənin olmasını vurğuladı: “Artıq 30 ildir ki, Azərbaycan xalqının qanı axıdılır, şəhidlərin sayı hər gün artır. Doğrudur, vətən şəhid qanıyla qorunar, uğrunda tökülən qanlardır bayraqları bayraq yapan. Amma artıq insanların səbirləri tükənib və bu savaşa son qoyulmalıdır, erməni vandalları torpaqlarımızdan qovulmalıdır. Biz də Niderlandda fəaliyyət göstərən diasporaçılar və bizim arxamızda olan minlərlə soydaşlarımız hər zaman dövlətimizin və əsgərlərimizin, xalqımızın arxasındayıq”.
Niderland-Belçika Azərbaycanlıları Koordinasiya Şurasının digər əlaqələndiricisi, Avropa Azərbaycanlıları Media Qrupunun rəhbəri Emil Əliyev də çıxış edərək çıxış edənlərin fikri ilə həmrəy olduğunu bildirdi və qeyd etdi ki, artıq Ermənistan hərbi qüvvələrinin Azərbaycan sərhəddini pozaraq Tovuz rayonu istiqamətində hücuma keçdikləri barədə holland dilində bəyanat hazırlanıb və sosial media vasitələriylə holland ictimaiyyətinin diqqətinə çatdırılıb. Eyni zamanda da Niderland Krallığında fəaliyyət göstərən bütün diaspora təşkilatlarının imzası ilə lazımi beynəlxalq siyasi qurumlara göndərilib.
İclasda iştirak edən digər təşkilatların rəhbərləri də - Elxan Mirhəşimli, Firəngiz Bağırova, Sima Cəfərova, Kəmalə Ceylinova, İlkin Hüseynov da bu ağır günlərdə xalqımızın, dövlətimizin və ordumuzun arxasında olduqlarını dilə gətiriblər.
Sonda bütün diaspora nümayəndələri aşağıdakı qərarları qəbul etdilər:
Ermənistan hərbi qüvvələrinin qəfil hücumunu pisləyən bəyanatların ingilis və holland dilində yayılması və bütün beynəlxalq siyasi qurumlara göndərilməsi;
Erməni vəhşiliyini ictimaiyyətin diqqətinə çatdırmaq üçün Ermənistan səfirliyinin və Parlamentin qarşısında mitinq təşkil edilməsi;
Ordumuzu və əsgərləri motivasiya etmək məqsədilə maddi və mənəvi dəstək göstərilməsi.
.JPG)
