Vətəni sevmək xalqını, onun tarixini, ata-babalarının məzarları olan, böyüyüb-başa çatdığın, hər bir zərrəsi ilə bağlı olub üzərində dayandığın torpağı, onunla əlaqəli bütün gözəllikləri sevmək deməkdir.

 

İnsan vətənini seçmir, lakin ona görə məsuliyyət daşıyır, taleyini xalqının taleyi ilə bağlayır, bu torpağın inkişafı, tərəqqisi və mənəvi rifahı üçün çalışır. Əbəs yerə deyil ki, vətənə məhəbbət məhz imanın əsası, inanc hissələrindən biridir. İnsan aid olduğu vətəni sevir, çünki bu hiss onun fitrətində əbədi bağlılıq kimi təcəssüm edir. Vücudun ruhla əlaqəli olduğu kimi, insan da öz xalqı ilə əlaqə qurarkən həyatının dolğunluğunu hiss edir və onun xeyirinə çalışır. Vətən, əslində insanın doğulduğu və böyüdüyü ölkədən daha böyük bir məfhumdur. Onu tam dərk etmək üçün insanın ruhu vətəninin tarixi, adət-ənənələri, həyat şəraiti, milli-mənəvi dəyərləri, çayları, gölləri, dərələri, dağlıqları ilə birləşməlidir.

 

Hər bir xalq özünəməxsus keyfiyyətlərə sahibdir. Daha aydın şəkildə desək, eyni iqlim, oxşar iş və yaşayış şəraiti, ortaq maraqlar və davranış normaları – bütün bunlar insanları bir araya gətirir və birləşdirir. Digər tərəfdən, dövlət bu münasibətləri qanunlar və dəyərlər sistemi ilə möhkəmləndirir. Vətənə sevgi təbii bir hissdir və insan bunu şüurlu şəkildə hiss edir. Mənəvi baxımdan zəngin bir insan üçün bu, vətəndaş kimi öz vəzifəsini dərk etmək, onu hər kəsə qarşı qorumaq, ona sahib çıxmaq, başqa ölkələrdə layiqincə təmsil etməkdir. Ancaq bir insan mənəvi baxımdan kasıbdırsa, onda bu hiss kor instinktə çevrilir, bəzən ədalət və ağıl səsinə kölgə salır.

 

Çox təəssüf ki, bu vəziyyəti tam dərk etməyən siyasi savadı yetərincə olmayan həmvətənlərimiz də sosial şəbəkələrdə və KİV-lərdə öz doğma, canından, qanından olan xalqa, böyüyüb başa çatdığı vətəninə qarşı iddia ilə çıxış edirlər. Düşünürəm ki, bu həssas məsələlərə hər birimiz diqqətlə yanaşmalı və bütün yazılarımızda, paylaşımlarımızda Azərbaycanımızı təmsil etdiyimizi unutmamalıyıq.

 

Bu gün müharibə şəraitində yaşayan və erməni kimi bir düşmənlə üz-üzə qalan Azərbaycan üçün bu məsələ xüsusilə həssasdır. Əsl birlik olma, həmrəylik nümayiş etdirmə zamanı, fürsətidir. Bizim bir düşmənimiz var, o da terrorçuluq, separatçılıq, faşizm kimi siyasəti özünə dövlət siyasəti, hədəf seçən Ermənistan. Bir vətənimiz var – o da Azərbaycan! Hər birimiz durmadan müxtəlif dillərdə erməni təcavüzkarlığını, dinc əhaliyə qarşı törədilən qəddarlığını təbliğat xarakterli paylaşmalarımızda göstərməli, böhtan dolu çağırışları ifşa edərək erməniliyin mahiyyətini dünya ictimaiyyətinə çatdırmalıyıq.

 

Vətəni sevmək, onun uğrunda savaşmaqdır. İstər səngərdə, istərsə də virtual dünyada, informasiya məkanında. Son dövrün hadisələri azərbaycanlıların gücünü, birliyini bir daha dünyaya göstərdi. Dünyanın bir çox ölkələrində əllərində Azərbaycan bayrağı, dillərində vətən, Qarabağ çağırışları dəstək yürüşlərinə çıxan xaricdə yaşayan soydaşlarımız və sosial şəbəkələrdə, mətbuatda uğurlu təbliğat aparan sosial, siyasi statusundan asılı olmayaraq hər bir vətəndaşımız qəlblərində vətən sevgisi ilə əzmkarcasına düşmənə qarşı mübarizə apardılar. Heç şübhəsiz vətən uğrunda bu mübarizəmiz davam edəcəkdir…

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan