“Bu ayda Xocalı soyqırımı baş verib və mənim qardaşlarım, qohumlarım, kəndlilərim şəhid olublar. Allah hamısına rəhmət eləsin. Bütün şəhidlərimizin qarşısında baş əyirəm. Həmişə gözləyirik ki, biz Xocalıya qayıdacağıq. İnanıram ki, Ali Baş Komandanımızın rəhbərliyi altında bu məsələ həll olunar və biz Xocalıya qayıdarıq”.
Bunu Moderator.az-a açıqlamasında Milli Qəhrəman Əlif Hacıyevin bacısı Şükufə xanım deyib. Şükufə xanım Xocalı faciəsində iki qardaşını itirdiyini bildirib:
“Ümumiyyətlə, heç istəmirəm ki, fevral ayı gəlsin. Fevral ayından başqa ilin 11 ayını sevirəm. Bu ayda Xocalı soyqırımı baş verib və mənim qardaşlarım, qohumlarım, kəndlilərim şəhid olublar. Allah hamısına rəhmət eləsin. Bütün şəhidlərimizin qarşısında baş əyirəm. Həmişə gözləyirik ki, biz Xocalıya qayıdacağıq. İnanıram ki, Ali Baş Komandanımızın rəhbərliyi altında bu məsələ həll olunar və biz Xocalıya qayıdarıq. Allah Ali Baş Komandanımıza cansağlığı versin, ömrü uzun olsun. O, tarix yazan bir sərkərdədir. Əlif Arxangelskidə oxuyanda vətən həsrəti onu qoymadı qəriblikdə qalsın. Həmişə atamla söhbəti zamanı deyirdi ki, “çalış məni vətənə qaytar”. Əlif bununla da Qarabağa gəldi. Hələ o, Rusiyaya gedəndə özüylə apardığı Heydər Əliyevin fotosunu gətirdi və itkin düşən qardaşım Süleymanın evindən asdı. Dedi ki, “mənim H.Əliyevə böyük hörmətim var”.
Şükufə ermənilərin bu müharibəni başlatdığını deyib:
“Əlif ermənilərə qarşı mübarizə aparmağa başladı. Hətta bir dəfə Ballıca kəndindən ermənilər İrəvana 800 min rubl aparanda Əlif onları yolda tutmuşdu. Amma Əlif tək olduğu üçün onlar qaçmışdılar və pulu da aparmışdılar. Biz Xocalı faciəsini ürək ağrısıyla qeyd edirik. Fevral ayı biz Xocalı camaatı üçün faciədir. Bir gecədə 613 nəfər adamı amansızcasına qətlə yetirmək nə deməkdir. Putin bir dəfə Sumqayıtdakı hadisələri tez gündəmə gətirdi. Amma Xocalıda baş verənləri heç yadına salmır. Bu müharibəni birinci ermənilər başlayıb. Biz onlarla birlikdə yaşayırdıq, heç bir sözümüz-söhbətimiz yox idi. Ən gözəl baxımlı şəhər Xankəndi idi. Biz orda yaşayırdıq, mən orda xəstəxanada işləmişəm. Ermənilərə neyləmişdik ki, onlar bizi evimizdən-eşiyimizdən didərgin saldılar?! Heç vaxt yadımdan çıxmaz, anamın 1988-ci ildə ürəyi partladı öldü. Onda elə bilmişdi ki, bizi də öldürüblər. Fevralın 20-də anamın ürəyi partladı. Mənim balaca qızım bağçaya gedəndə dedi ki, “ana, bağçaya getmirəm. Ermənilər mənə “tork”, yəni türk deyirlər, döyürlər”.
Şükufə xanım Xocalıya qayıtdıqdan sonra şəhid qardaşıyla bağlı arzusundan da danışıb:
“Xocalıya qayıtdıqdan sonra tək arzum odur ki, Xocalı aeroportu Əlifin adına verilsin. Çünki bilirsiniz ki, Əlif o aeroportun komendantı olub, orda işləyib. Əlifin etdiklərini nəinki mən, bütün xocalılar unutmaz”.
Qeyd edək ki, bu gün Milli Qəhrəman Əlif Hacıyevin vəfatından 29 il ötür.
