Qarabağın 30 illik işğalının və müharibənin bitməsinə baxmayaraq Ermənistan öz çirkli əməllərindən əl çəkmir. Minalanmış ərazilərin xəritəsini verməkdən imtina edən Ermənistan regionda sülh quruculuğu və stabilliyi təhdid altına salır.

Ermənistanın bu qanunsuz əməlinin qarşısını almaq üçün beynəlxalq ictimaiyyətin də iştirakı çox vacibdir. Bu istiqamətdə qeyri-hökumət təşkilatlarının fəallığı xüsusi əhəmiyyət kəsb edir.

Beynəlxalq Avrasiya Mətbuat Fondunun prezidenti Umud Mirzəyev, Azərbaycan Minadanzərərçəkənlər Assosiasiyasının sədri Rey Kərimoğlu, “Minalar Əleyhinə Azərbaycan Kampaniyası” İB-nin sədri Hafiz Səfixanov, “Dayaq” Qeyri Hökumət Humanitar Təşkilatının sədri Şahin İbrahimov, “Mina Qurbanlarının Sosial-İqtisadi Problemlərinin Həllinə Kömək” İB-nin sədri Məmmədhəsən Həsənov 25 mart 2021-ci il tarixində hüquqi ədalətin bərpası üçün Minalanmış Xəritələrin qaytarılması ilə bağlı petisiya təşəbbüsü ilə çıxış edib. BAMF-ın prezidenti Umud Mirzəyevin rəhbərliyi ilə irəli sürülmüş bu addım Azərbaycana qarşı olan ədalətsiz mövqenin qarşısının alınmasına böyük önəm kəsb edir.

Azərbaycan Jurnalistlər Şəbəkəsi İctimai Birliyinin sədri Ayaz Mirzəyev BAMF-ın irəli sürdüyü layihə ilə bağlı fikirlərini Eurasia Diary-yə bildirib.

O, bu problemin beynəlxalq səviyyədə qaldırılmasında Beynəlxalq Avrasiya Mətbuat Fondunun təşəbbüsünu təqdirəlayiq hesab edir.

“Ermənistan tərəfi sadəcə işğal dövründə deyil, hətta məğlubiyyətdən  sonra da qeyri-insani siyasətini davam etdirir. Minalanmış ərazilərin xəritəsini Azərbaycana verməməklə onlar hərbi cinayət törətmiş olurlar. Səhv etmirəmsə, ANAMA-nın apardığı tədqiqata görə, təxminən 350-830 milyon kvadratmetr ərazidə təxminən 50-100 min ədəd mina basdırılıb. Bu, olduqca böyük rəqəmdir. Ermənistanın minaladığı ərazilər müharibə təsirinə məruz qalmış torpaqları, Ermənistanla sərhədboyu rayonları əhatə edir. Qaydalara görə, ərazilər minalananda xəritə tərtib olunur. Bir nüsxəsi də həmin dövlətin Silahlı Qüvvələrinin Baş Qərargahında olur. Onların bu xəritəyə malik olmadığına dair iddiaları tamamilə absurddur. Ermənistan tərəfi istəsə, bunu ya Azərbaycan tərəfinə, ya da Rusiya sülhməramlılarına təqdim edə bilər. Lakin söhbət burada insan həyatından gedir. Xəritələrin verilməməsi günü bu gün də insanların minalardan əziyyət çəkməsinə gətirib çıxarır. Təsəvvür edirsiniz, Ermənistanın məğlubiyyətindən bu günədək nə qədər hərbçi mütəxəssis və mülki vətəndaş minaya düşərək ya əlil olub, ya da həyatını itirib”, deyə Ayaz Mirzəyev söyləyib.

Onun sözlərinə görə, belə bir vəziyyətdə beynəlxalq ictimaiyyət Ermənistanın qarşısında tələb qoymalıdır ki, əgər regionda yenidən stabilliyin bərpa olunmasını və əməkdaşlıq mühitinin yaranmasını istəyirsə, ən azı mina xəritələrini Azərbaycan tərəfinə təqdim etməlidir. Bununla da həmin bölgədə minaların təmizlənməsi prosesi ən qısa vaxtda bitə bilər.

Jurnalist Ermənistanın xəritəni vermək üçün lazımı qətiyyət və iradə göstərmədiyini bildirib. Bu məqamda BAMF-ın fəaliyyəti yüksək əhəmiyyətə malikdir.

“BAMF həmişə ən yüksək səviyyədə təşkilatın prioritetinin məhz Azərbaycanın üzləşdiyi çətinliklər və ədalətsizlik olduğunu göstərib. Bunu həmişə beynəlxalq tribunalardan dünyaya çatdırıb. Bildiyiniz kimi, BAMF Azərbaycanın BMT ECOSOC-un Əsas Məşvərətci Statusu olan yeganə təşkilatıdır. Bu yeganəlik əslində BAMF-ın çiyinlərinə çox böyük məsuliyyət qoyur. BAMF rəhbərliyi də bunu çox yüksək səviyyədə dərk edir. Bu istiqamətdə də fasiləsiz olaraq addımlar atılır. Növbəti addımlardan biri də petisiyanın hazırlanmasıdır. Bu təşəbbüs çox vacib əhəmiyyətə malikdir. Mənim müşahidəmə görə həm Azərbaycanda, həm xaricdə yaşayan çoxlu sayda insanlar bu təşəbbüsə qoşulub. Petisiya minalanmış ərazilərin xəritəsini tələb etməklə vacib missiyanı həyata keçirir. Bu məsələyə kifayət qədər obyektiv baxan şəxslərin petisyanı dəstəkləməsi çox vacib məqamdır. Çünki burada söhbət sayı yüz minlərlə ölçülən minalar və potensial olaraq bu minalardan əziyyət çəkəcək insanların həyatından gedir. Söhbət insan həyatından gedirsə, hər kəs öz prinsipiallığını, öz sülhsevərliyini göstərməlidir. Xüsusilə Ermənistan bu işə qol qoymalıdır, əks halda biz onun qeyri-konstruktiv, sülhə-zidd mövqedə olduğunu anlayacayıq. Məntiqlə belə bir təəssürat yaranır. BAMF-ın belə bir təşəbbüsünü dəstəkləyirəm. Bu petisiyaya ilk qoşulanardan da biri mənəm. İnanıram ki, bu petisiya müsbət nəticə ilə sonlanacaq. Çünki çoxlu sayda insan artıq qoşulub. Demək olar ki, bu təşəbbüs özünü doğruldub. Bu, olduqca önəmli problemi əhatə edir. Bir daha BAMF-ın rəhbərliyinə minnətdarlığmı bildiriəm ki, onlar belə bir təşəbbüslə çıxış ediblər”, deyə Ayaz Mirzəyev söyləyib.

Ülvi Əhmədli