Tibbi Ərazi Bölmələrini İdarəetmə Birliyinin (TƏBİB) və Türk Əməkdaşlıq və Koordinasiya Agentliyinin (TİKA) birgə təşkilatçılığı ilə elmi tədqiqat institutlarının əməkdaşları üçün Qazi Universitetinin professorları tərəfindən "Elmi tədqiqatların metodologiyası” adlı təlimlərin keçirilməsinə başlanılıb.
Ednews xəbər verir ki, açılış mərasimində Türkiyənin Azərbaycandaki səfiri Cahid Bağcı, İcbari Tibbi Sığorta üzrə Dövlət Agentliyinin İdarə Heyəti sədrinin müavini Nigar Bayramova, Türkiyə Respublikası Qazi Universitetinin Tibb fakültəsinin dekanı professor Mustafa Necmi İlhan, TİKA-nın Bakı Proqram koordinatoru Fatih Yılmaz, agentliyin Strateji təhlil departamentinin rəhbəri Araz Nəsirov, TƏBİB-in İdarə Heyəti sədrinin müşavirləri Elmir Bəşirov və Firəngiz Əliyeva, Strateji inkişaf departamentinin rəhbəri Yaqut Qarayeva, Tibbi fəaliyyətin təşkili departamentinin rəhbəri Teymur Mirzəbəyli və müvafiq struktur bölmələrinin əməkdaşları iştirak edib.
Mərasimdə fövqəladə və səlahiyyətli səfir Cahid Bağcı, Qazi Universitetinin Tibb fakültəsinin dekanı professor Mustafa Necmi İlhan, TİKA-nın Bakı Proqram koordinatoru Fatih Yılmaz çıxış ediblər.
Daha sonra institutlarda çalışan mütəxəssislər üçün təlimlərin keçirilməsinə başlanılıb.
Qeyd edək ki, ümumilikdə 25 tədqiqatçının iştirak etdiyi təlim iki gün davam edəcək və sonda iştirakçılara təlim kursunu başa vurmalarına dair sertifikat veriləcək.
