Fevralın 13-də paytaxtın Binəqədi rayonu Eldar Babayev küçəsində güclü külək nəticəsində sökülməkdə olan “Səma şadlıq evi”nin divarı aşaraq ərazidə parklanan 3 avtomobili yararsız vəziyyətə salıb.

Hadisə ilə bağlı Ednews-a müraciət edən Həsənova İlahə Bayram qızı avtomobilinə dəymiş ziyanın dəyərinin ödənməsini istəyir. Şikayətçinin sözlərinə görə, avtomobilin icbari sığortası olduğu üçün ona dəyən ziyanı sığorta şirkəti tərəfindən ödənilmir. Bu vəziyyətdə nəqliyyata dəyən ziyanın xərcinin ödənilməsinin bir yolu var – o da avtomobilin yararsız vəziyyətə düşməsinə səbəb olan şirkət. Şikayətçilərə isə restoranın sahibini tapa bilmədikləri deyilib.

Şikayətçi ilk olaraq problemlərinin həlli üçün Binəqədi rayonu 7-ci polis bölməsinə və icra hakimiyyətinə müraciət edib. İcra hakimiyyətindən işə baxılacağını bildiriblər. İlahə xanım qeyd edir ki, avtomobili ötən ilin sonunda əldə edib və minik vasitəsi ailənin dolanışığına xidmət edir. Hazırda ailə çıxılmaz vəziyyətdə qalıb. 

Qeyd edək ki, binada söküntü işləri icra hakimiyyəti tərəfindən aparılır. Söküntü üç aydır ki, davam edir. Binanın ancaq dam örtüyü sökülüb. Bir aydır ki, proses dayandırılıb. Qəzalı vəziyyətdə olan tikilinin tamamilə uçmaq təhlükəsi var. Binanın divarının bir hissəsi uçaraq piyadaların hərəkəti üçün manəe yaradır və potensial risk daşıyır. Tikili uçarkən ərazidə olan insanlar təhlükədən son anda yayına biliblər. 

Məsələ ilə bağlı polisə müraciət edilib.

Hazırda faktla bağlı araşdırılma aparılır.

Məsələni diqqətdə saxlayacağıq.

Gülnar Səlimova