Xəbər verdiyimiz kimi, ötən gün Rusiyalı videobloqer Hüseyn Həsənovun Park Bulvarda pərəştişkarları ilə keçirdiyi görüş zamanı yaşanan izdiham ictimaiyyət arasında böyük rezonansa səbəb olub.
İctimaiyyət arasında həm Hüseyn, həm də onunla görüşə gələn minlərlə pərəştişkarı müzakirə mövzusuna çevrilib.
Məsələ ilə bağlı Azərbaycanın bir çox məşhur simaları sosial şəbəkə hesablarında fikir bildirib.
Hər kəs isə situasiyaya müxtəlif aspektlərdən baxıb.
Azərbaycanlı videobloqer Elçin Ləmbəranski düşünür ki, bu cür fanatlıq olmur. O, bunu Ednews-a açıqlaması zamanı deyib.
“Dünən yaşanan hadisə özünə hörmət edən insanlar tərəfindən heç vaxt xoş qarşılana bilməz. Orada çox insan əzildi, ürəyi getdi və hətta insanları şallaqlayan da tapıldı”.
Söhbət zamanı E. Ləmbəranski bildirib ki, Hüseyn Həsənovun Azərbaycan üçün böyük iş gördüyünü eşitməyib, lakin məşhur bloqerə iradı da yoxdur.
“3 min şəhidimiz var və bu gün o gəncliyin 90 faizi heç bir şəhid və qazi qapısını tanımır, yüyürüb özünü o vəziyyətə salmağı bir vətəndaş olaraq adamı utandırır. Bunu mədəniyyət çərçivəsində etmək lazımdır. Dünən orada Azərbaycan gəncliyi ayaqlar altına atılmışdı. Bəzi valideynlər övladlarını düzgün təlim-tərbiyə etmirlər. Axı bizim çox ağıllı gənclərimiz də var. Necə oldu ki, pandemiya vaxtı o qədər insanın Park Bulvar-da bir yerə toplamasına icazə verildi”.
O, qeyd edib ki, Azərbaycanda hər hansı bloqerin izləyici kütləsi çox ola bilər, amma bu fan ordusu anlamına gəlmir.
“Biz bunu ilk dəfə Rusiyada yaşayan azərbaycanlı bloqer Hüseyn Həsənovun timsalında gördük. Bəxtiyar Vahabzadə “özgəyə itaət, özünə rişxənd bəlkə də bu millətin fitrətindədir” deyib. Bizdə qıraqdan gələnlərə daha böyük meyllik var. Bunu zaman-zaman Türkiyədən gələn sənətçilərin timasalında da görmüşük. Özümüzə heç zaman qiymət verə bilmirik. İnanın, Azərbaycanda nə qədər sevilsən belə, əgər burada yaşayırsansa səni belə qarşılamazlar”.
Mən düşünmürəm ki, ora bir telefona görə gəlmişdilər, əsasən Hüseynə fanatlıq edənlər yığışmışdı.
“Bir bloqerə fanat ordusu yığmaq üçün hansısa bir qabiliyyət tələb olunmur. Fanat istəyir ki, onun izlədiyi şəxs çox bahalı görünsün. Həm əlçatan olsun, həm də bir az uzaq olsun. Bu ölkədə xidmətlərimizi bilən bilir, bilməyən heç vaxt da bilməyəcək, ən azı üç ildir əziyyət çəkirik. Amma izləyiciyə o qədər yaxınıq ki, o istədiyi vaxt zəng edib bizi tapa, görə bilir. Bu səbəbdən izləyici üçün adiləşirik”.
Gülnar Səlimova
