Nərimanov rayonu Montin qəsəbəsi Mayakovski 15 ünvanında yerləşən bina artıq uzun illərdir ki, qəzalı vəziyyətdədir. İllərdir bina sakinləri aidiyyatı qurumlara həyatı təhlükələrinin olduğunu, binanın hər an uça biləcəyi barədə xəbər versələr də hələ də bu ərazi barədə ölçü götürən yoxdur.
Bu barədə Ednews-a bina sakinlərinin özləri məlumat veriblər. Onlar bildirirlər ki, 90 yaşı olan bu bina nə memarlıq abidəsidir, nə də tarixi nümunə. Sakinlərin sözlərinə görə övladları istirahət üçün həyətə çıxa bilmirlər. Səbəb isə binanın uçuq-sökük daşlarının yerə tökülməsidir.
“Bir neçə dəfə uşaqların başına eyvanlardan qopan daş parçaları düşüb. Bina qəzalı vəziyyətdə olduğu üçün, yaşlı insanlar pilləkanlarla mənzillərinə qalxıb-düşə bilmirlər. Nəinki eyvanlar, hətta mənzillərin divarları, hər mərtəbədə olan pilləkanlar belə dağınıq haldadır. Bununla bağlı dəfələrlə Fövqəladə Hallar Nazirliyinə müraciət etsələr də, qurumdan cavab ala bilməmişik”.
Fövqəladə Hallar Nazirliyi isə…
Sakinlərin şikayəti əsasən Fövqaladə Hallar Nazirliyinin mətbuat xidmətindən Ednews-a bildiriblər ki, bu cür köhnə tikililərə məsuliyyəti balans saxlayıcı qurum daşıyır.
“Hər bir binanın balans saxlayıcı təşkilatı olur. O, bu binanın durumu ilə bağlı məsuliyyət daşıyır. Əgər şübhə yaranarsa ki, bina qəzalı vəziyyətdədir, insanların yaşaması üçün təhlükəlidir, o zaman balans saxlayan təşkilat rəsmi şəkildə Fövqəladə Hallar Nazirliyinə müraciət etməlidir. Müraciətdə binanın qəzalı vəziyyəti, insanların orada yaşamasının qeyri- mümkün olması haqda məlumat verilməlidir. Bu zaman da Fövqəladə Hallar Nazirliyi binaya baxış keçirir və orada müayinə aparıb, rəyi balans saxlayıcı təşkilata təqdim edir. Əgər sözügedən binada FHN əməkdaşları orada olublarsa, demək ki, binanın vəziyyəti ilə bağlı rəy balans saxlayıcı təşkilata təqdim olunub. Yalnız onlar binanın son durumu barədə vəziyyətin nə yerdə olmasını açıqlamalıdırlar”.
Məsələ ilə bağlı son durumu isə Ednews-a 38 saylı Mənzil Kommunal İstismar Sahəsi rəisi Seyfəddin Heydərov verib. Seyfəddin Heydərovun sözlərinə görə, binanın qəzalı olması barədə aidiyyatı qurumlara müraciət edilib.
“Binanın qəzalı olması barədə Fövqəladə Hallar Nazirliyinin müvafiq rəyi var və aidiyyatı qurumlara müraciət edilib. Sakinlərin köçürülməsi məsələsinə gəlincə, onların köçürülməsi Nazirlər Kabinetinin müvafiq qərarı əsasında həyata keçirilir. Burada birmənalı qərar olmalıdır və yalnız bundan sonra köçürülmə məsələsinə baxılır”.
Göründüyü kimi aidiyyatı qurumlar günahı bir-birlərinin üzərinə atırlar, məsələ isə öz həllini tapmır.
Ednews binanın qəzalı vəziyyətdə olmasını əks etdirən fotofaktları təqdim edirik:
Ləman Abbaslı, Fariz Faiqoğlu