Son günlər uşaqlar arasında rotavirus sürətlə yayılmaqda davam edir.
Əsasən qusma, ishal və hərarətlə müşahidə olunan xəstəlik azyaşlı, xüsusilə də bağçaya gedən uşaqlarda daha çox rast gəlinir. Hətta virusa yoluxma ilə bağlı bir ölüm hadisəsi də qeydə alınıb.
Rotavirusun yayılma qaynağı kimi isə əsasən uşaq bağçaları göstərillir.
Bəs, görəsən bağçalarda yoluxmanın qarşısının alınması üçün hansı tədbirlər görülür? Xəstə uşaqların bağçalara qəbulu necə yoxlanılır?
Ednews olaraq paytaxtda fəaliyyət göstərən özəl bağçalardan birində müşahidə apararaq, müəssisənin rəhbərliyi ilə həmsöhbət olduq.
Baxçanın təsisçi və rəhbəri Günel Əhmədova son günlərdə bağçada sözügedən virusa yoluxmanın aşkarlanmadığını bildirib.
“Son iki həftə ərzində bağçamızda rotavirusa yoluxma qeyd alınmasa da uşaqlar arasında mövsümi qrip müşahidə olunur”.
Bağça rəhbərinin sözlərinə görə, azyaşlılarda xəstəlik simptomları aşkar olunan kimi dərhal digər uşaqlardan təcrid olunurlar.
“Səhərlər uşaqlar bağçaya yoxlanılıb, qəbul olunurlar. Bu zaman onlarda hər hansı bir əlamət aşkar olunarsa, dərhal evə buraxılırlar. Lakin gün ərzində hər hansı sustalma, narahatlıq, qızdırma halları müşahidə edildikdə isə, həmin uşaqlar digərlərindən təcrid olunur və valideyninə dərhal məlumat verilir. Çünki bu, birmənalı olaraq digər uşaqlar üçün də təhlükə yarada bilər. Həm də heç bir ana uşağının qızdırmalı halda bağçada qalmasına razı olmaz. Odur ki, özü gələ bilməsə belə ailə üzvlərindən və ya yaxınlarından kimsə gəlib usağı aparır”.
İlkin tibbi yardıma gəlincə isə Günel Əhmədova bağçada tibb bacısının çalışdığını və hərarəti olan uşaqları valideynə təhvil verənədək müəyyən tibbi yardımın göstərildiyini də bildirib.
“İlkin tibbi yardım olaraq tibb bacısı uşağa əgər heç bir alergiyası yoxdursa, qızdırmanı salmaq üçün yüngül dərman vasitələri verir. Amma bunu mütləq şəkildə valideynin icazəsi və tövsiyəsilə edirik. Çünki bağça olaraq bizim hər hansı uşağa tibbi müdaxilə etməyə, resept yazmağa, iynə vurmağa, dərman verməyə ixtyarımız və icazəmiz yoxdur. Hər uşağın orqanizmi fəqrlidir və bunu valideyni və həkimi daha yaxşı bilir“.
G. Əhmədova həmçinin qeyd edib ki, profilaktik olaraq Respublika Gigiyena və Epidemiologiya mərkəzinin ərazi bölməsi ayda 1 dəfə olmaqla bağçada dezinfeksiya işləri aparır.
“Respublika Gigiyena və Epidemiologiya mərkəzi 1 həftə öncə bağçamızda olub və növbəti dezinfeksiya işləri may ayının əvvəllərinə planlaşdırılır. Bundan əlavə bağçada gündəlik olaraq texniki işçilərin köməyilə uşaqların tez-tez əlləri yuyulur və spirtlənir. Həftsonları isə qapı tutacaqları, uşaqların istifadə etdikləri oyuncaqlar yuyulub spirtlənir”.
Sonda Günel xanım qeyd edib ki, sürətlə yayılmaqda olan rotavirusun qarşısını almaq məqsədilə uşaqlar səhərlər tibb bacısı tərəfindən hərarətləri ölçülərək bağçaya buraxılır.
Ülviyyə Fərhad
