Yay fəslinin gəlişi ilə bölgələrdə turizm sektorunun canlanmasına səbəb olub. Bu canlanma əsasən Qəbələ, Lənkəran, Şamaxı və s. bu kimi turizm obyekti olan yerlərdə müşahidə edilir. Bu il istirahət edənlərin əksəriyyəti yerli turistlər olsa da, xarici vətəndaşlar da üstünlük təşkil edir. İstirahət üçün İsmayıllıya gedənlər də az deyil. Azərbaycan Turizm Bürosunun Regional İnkişaf bölməsinin müdiri Hüseyn Məmmədov Ednews-a açıqlamasında qeyd edib ki, turistlər adətən Bakıya yaxın olan ərazilərə üz tuturlar.
“Turizm sektorunun inkişafı turistlərin zonalara axınından asılı olaraq dəyişir. Turistlər də adətən yaxın yerlərə üstünlük verirlər”.
Hüseyn Məmmədov ayrı- ayrı bölgələr üzrə turist axını və tələbatdan da söz açıb.
Quba-Qusar zonası...
“Əfsuslar olsun ki, hazırda Bakı-Quba yolu təmirlə əlaqədar turizm üçün əlçatan deyil. Çünki normalda 2 saatlıq yolu gedənlər bura 3-4 saata çatır. Bu narahatlığa görə bu bölgələrə gedən turist sayı cari illərə nisbətən azalıb. Amma Qəçrəş, Qımılqazma, Qırızdəhnə kəndi ətrafında bir çox yeni turizm obyektləri istifadəyə verilib. Burada həm yerləşmə, həm də ictimai iaşə obyektləri çoxluq təşkil edir”.
“Qusarda yerləşən Şahdağ yay və qış turizm istirahət yerlərinə də gedənlərin sayı çoxdur. Yenilikcə, orada tikilən “Roller coaster” istifadəyə verilib. Bu da bir növ əyləncə xarakteri daşıyır. Həmçinin restoranlar, kafelər və bu kimi ictimai iaşə obyektləri var”.
Şamaxı- Qəbələ- Şəki- Zaqatala-Qax
“Bu istiqamətdə ictimai iaşə obyektləri çoxdur. Təkcə bu yox, həm də tavanları üçbucaq tipli evlərin olması gələn turistlərin marağına səbəb olur. Həmçininndə çox maraqlı aqrotəsərrüfatlar yaradılıb. Bunlardan biri Ləkit bal evidir. Belə maraqlı konseptlər turistlər üçün əyləncə və istirahətlərini daha yaxşı keçirmək üçün düşünülüb”.
Lerik-Lənkəran-Astara
“Cənub rayonlarında da investisiyaların yatırılması hesabına turizm sektoru baxımından yaxşı inkişaf edib. Lerikdə Hamarmeşə kəndində təxminən 45-dən çox qonaq evi fəaliyyət göstərir. Eyni zamanda Lənkəranda da belə qonaq evləri istifadəyə verilib. Son dövrlərdə həmçinin Astaranın dağ kəndləri çox populyarlaşıb. Bu yerlərə turistlər sıx səfər edir. Apiterapiya mərkəzi yaradılan bu yerlər insan sağlamlığı üçün nəzərdə tutulub. Bura əsasən ağ ciyər xəstəliyindən əziyyət çəkənlər gəlir və müalicə alır. Həmçinin Lənkəranda keçmişdən qalmış çay fabriki var. Turistlər gedib, burada çayın hazırlanması prosesi ilə tanış olurlar. Sonda isə dadına baxmaq üçün onlara yerindəcə çay da təklif olunur. Yaxın ərazilərdə isə turistlər üçün gecələmək üçün kənd həyatını xatırladan evlər var. Beləliklə, onlar həm kənd həyatının içində olur, həm də dincəlmək üçün evlərdə gecələyirlər”.
Bəs, turizm sektoru nə qədər inkişaf edib? Ümumiyyətlə bu il digər illərə nisbətən turistlərə nə maraqlı gəlir? Hüseyn Məmmədov bu sualı da cavablandırıb. O, bu il daha çox aqroturizmin inkişaf etməsi və gələn qonaqların maraq dairələrinin başqa obyekt olduğunu deyib.
“Ölkədə aqroturizm təsərrüfatlarının qeyri-adi fiqurlu evlərin sayı artır, qonaq evləri təkmilləşdirilir. Hazırda otellər dəbdə deyil. İnsanlar tam istirahət etmək istəyir. Buna görə də onlar aqroturizm tipli yerlərə üstünlük verirlər. Bu otellərə baxanda daha da ucuzdur. Qarşıdakı illər ərzində turizmin inkişafı ilə bağlı regionlarda üç illik layihə hazırlanır. Bu layihə həm turizm yerlərində infrastruktur işlərinin görülməsi, həm invertarlarla danışıq planlanır. Layihə Turizm inkişaf Agentliyi və BMT-nin birgə təşkilastçılığı ilə həyata keçirilir. Quru sərhədlərinin açılmasını gözləyirik. Ondan sonra turistlərin sayı daha da artacaq. Buna səbəb sağlamlıq komplekslərinin sayının daha da çoxalmasıdır”.
İstirahət üçün bölgələrə üz tutanlar turizm obyektlərinin əlverişli şəraitə uyğun olması ilə yanaşı həm də maddiyyata önəm verirlər. Əlbəttə ki, təlabatın artması qiymətlərin bahalaşması ilə nəticələnir.
Bəs, turizm qaynaqları olan bölgələrdə bir günlük istirahət beş nəfərlik ailəyə neçəyə başa gəlir?
Azərbaycan Turizm Bürosunun Regional İnkişaf bölməsinin müdiri Hüseyn Məmmədov Ednews-a açıqlamasında hər kəs üçün maraqlı olan bu nüansa da toxunub.
“Qərb destinasiyasında qiymətlər çox aşağıdır. Məsafəyə uzaqlığına görə Gəncə, Daşkəsən, Tovuz, Gədəbəy istiqamətinə səfər edənlər azlıq təşkil edir. Amma Şamaxı və Qəbələ istiqamətində qiymətlər daha yüksəkdir. İsmayıllıda isə qiymətləri orta hesab etmək olar. Çünki burada əyləncə turizmi demək olar ki, yox dərəcəsindədir. Cənub zonasında da qiymət çox münasibdir. Qəbələ, Qax, Şəki, Zaqatala istiqamətində isə əksinə çox bahadır. Təxmini götürdükdə beş nəfərdən ibarət ailə üçün bir günlük xərclər Qəbələ istiqamətində 200-250, cənub bölgələri üçün 150-200 daha uzaq rayonlarda isə daha az, hətta 100-150 manat miqdarında hesablanır”.
Ləman Abbaslı