Yayılan məlumatlara görə, Milli Məclisin deputatlarına verilən bəzi pul təminatları ləğv edilib.
Məsələ ilə bağlı REAL partiyasının sədr müavini Natiq Cəfərli Ednews-a bildirib ki, müəyyən bayramlarda deputatlara verilən müavinətlər ləğv edilsə də digər məsələlər, məsələn maaşın müəyyən faiz nisbətində sədrin maaşına bağlılığı olduğu kimi qalıb.
N. Cəfərli onu da qeyd edib ki, deputatların maaşlarının iki misli qədər artım olacağı gözlənilir.
Millət vəkili Fazil Mustafa isə bildirib ki, ədlində hesabla götürsək Milli Məclis deputatlarının əmək haqlarında xüsusi bir artım olmayıb. Məbləğ birləşdirilərək ümumi maaş halına salınıb və nəzərdə tutulan digər müavinətlər ləğv olunub. Lakin bu barədə xəbərlər dolaşsa da hələ ki, təsdiqini tapmayıb.
F. Mustafa, məzuniyyətdə olduğu zaman deputata verilən müavinətin ləğvi barədə isə bildirib ki, bu imtiyaz Milli Məclisin deputatlarına deyil, Həmkarlar ittifaqı üzvlərinə qanunda nəzərdə tutulan qayda ilə aid edilirdi.
Qeyd edək ki, bu il iyulun 1-dən etibarən deputata hər ay vəzifə maaşı, vəzifə maaşına əlavə və deputatlıq səlahiyyətlərinin yerinə yetirilməsi ilə əlaqədar xərclərin ödənilməsi üçün verilən vergilərdən azad olunan pul təminatı ləğv olunub.
Habelə, Milli Məclisin sədri, onun birinci müavini və müavinləri, Milli Məclisin komissiya sədrləri və onların müavinləri, Milli Məclisin deputatlarına verilən deputatlıq səlahiyyətlərinin yerinə yetirilməsi ilə əlaqədar xərclərin ödənilməsi üçün vəzifə maaşlarının 50 faizi məbləğində vergilərdən azad olunan aylıq pul təminatı ləğv edilib.
Gülnar Səlimova
.JPG)
