Bakıda 26 saylı marşrut üzrə hərəkət edən avtobus qəzaya uğrayıb.
Ednews xəbər verir ki, hadisə Cavadxan və Svetlana Məmmədova küçəsinin kəsişməsində baş verib. “Vətən” MMC-yə məxsus 26 saylı marşrut xətti üzrə hərəkət edən “Daewoo” markalı sərnişin avtobusu sürücünün idarəetməsindən çıxıb və yolun kənarındakı parkın yaşıllıq zonasının divarına çırpılıb. Hadisə nəticəsində kəsişmədəki işıqfora da ziyan dəyib. Xoşbəxtlikdən səkidəki piyadalar və avtobusdakı sərnişinlər arasında xəsarət alan olmayıb. Avtobusun nə səbəbə qəzaya düşməsi haqqında məlumatı əldə etmək üçün “Vətən” MMC-nin mətbuat xidməti ilə əlaqə saxladıq. Verilən məlumata görə qəzaya əyləc sisteminin sıradan çıxması səbəb olub.
“Havaların isti keçməsi ilə əlaqədar avtomobillərin hər birində belə problemlər olur. Ani vaxtda əyləc sisteminin sıradan çıxması səbəbindən sürücü avtomobili səkiyə çəkməklə saxlamağa çalışıb. Həmin vaxtı avtobusda sərnişin olmadığı üçün xəsarət alan da olmayan. Hadisə avtobusun qaraja getdiyi vaxtda baş verib”.
Sərnişinlər isə iddia edir ki, ümumiyyətlə 26 nömrəli avtobusun sürücüləri həm məsuliyyətsiz, həm də qeyri peşəkardırlar. Onların sözlərinə görə belə hadisə birinci dəfə deyil bundan əvvəl də baş verib. Vətən MMC-nin mətbuat xidmətinin rəsmi nümayəndəsinə ünvanladığımız bu sorğuya belə cavab aldıq.
“Sırf 26 nömrəli marşurutda qəza olur demək düzgün deyil. Avtobuslar hər gün xəttə çıxmazdan əvvəl texniki baxışdan keçir. Sürücülər isə tibbi olaraq yoxlanılır. Ümumiyyətlə sürücülərin işə alınması müəyyən kateqoriyaya uyğun olaraq seçilir. Elə sürücünün peşəkarlığına görə bu günki gündə qəza xəsarətsiz, problemsiz ötüşdü”.
Ləman Abbaslı