Sosial şəbəkələrdə ətin qiymətinin bahalaşması ilə bağlı məlumatlar yer alıb. İstifadəçilər qeyd edir ki, qəssablarda mal əti tapılmır. Bəzi qəssablar bunu Qurban bayramı ilə əlaqələndirsələr də bəziləri qiymətlərin bahalaşacaqları iddiasındadır. Bundan həm satanlar, həm də alanlar narazıdırlar.
Yayılan iddialar nə dərəcə doğrudur?
Azad İstehsalçılar Birliyinin sədri Eyyub Hüseynov qeyd edib ki, belə bir reallıq var və burada heç bir şaiyədən söz gedə bilməz.
“Bu reallıqdır, doğrudur. Ətin qiyməti bundan sonra da qalxacaq. Buna əsas səbəb fermer təsərrüfatlarında olan problemlərdir. Hazırda yemin qiyməti olduqca bahadır. Əhali heyvan saxlamaqdan sürətlə imtina edir, kəndlərdən şəhərə axın var. Bu da kənd təsərrüfatına başlıca olaraq heyvandarlığa mənfi təsir edir”.
Eyyub Hüseynov həm də prosesin hansı formada getməsindən danışdı. Açıqlamasında aidiyyatı qurumların buna ciddi nəzarət etməsini deyən Eyyub Hüseynov bəzi örüş yerlərinin pambıq əkilməsi üçün istifadə etdiklərini də nəzərə çatdırdı.
“Kəsim üçün heyvanlar böyük fermalarda cəmləşir.Təmərküzləşmə (bir yerə toplanmaq) getdiyi vaxtda isə qiymətlər karter sövdələşməsi hesabına müəyyən olunur. Ətin qiymətinin bazar prinsipləri ilə yox, karter sövdələşməsi ilə hesablanacaq. Qurumlar buna nəzarət etməli, elə siyasət aparmalıdır ki, fermer təsərrüfatında çalışanların hər birinin mal-qarasının yemləri əlçatan olsun, bu sahəylə məşğul olanlara şəraitlər yaradılsın. Lakin biz örüş torpaqlarında pambıq əkilməsinə təzyiq edirlər, bütün bu sərt siyasətin nəticəsidir ki, ətin qiyməti bahalaşır və bu belə də davam edəcəkdir”.
Qeyd edək ki, iddialara görə, bazarda 1 kiloqram quzu ətinin qiyməti 13-14 manatdan 2 manat bahalaşaraq, 15-16 manatadək qalxıb.
Ləman Abbaslı