Niderlandlı təhsil üzrə mütəxəssis, yazıçı Henri Van Rens bu gün Beynəlxalq Avrasiya Mətbuat Fondunun qonağı olub. Ednews xəbər verir ki, həyat yoldaşı ilə Azərbaycana birgə səfər edən qonaq BAMF-ın prezidenti Umud Mirzəyevlə görüşüb. Görüş zamanı Umud Mirzəyev təşkilatın 30 il ərzində fəaliyyəti və hazırda həyata keçirilən bir çox faydalı layihələr barədə söz açıb. O, BAMF-ın məhz Azərbaycanda baş verən konfliktin post-Sovet dönəmində dünyaya çatdırılması üçün yaranan zərurətdən dolayı əsasının qoyulduğunu deyib. BAMF prezidentli həmçinin 1980-ci illərin sonundan bəri Ermənitandan didərgin salınan azərbaycanlıların aqibəti, habelə I Qarabağ müharibəsi zamanı törədilən erməni vandalizmindən söz açıb. O, BMT və ona bağlı təşkilatların tədbirlərində dəfələrlə rəhbəri olduğu BAMF-ın azərbaycanı təmsil etdiyini və Qarabağ probleminin qabardılaraq dünya ictimaiyyətinə çatdırıldığını vurğulayıb.
Eyni zamanda, Qarabağın tarixi, Xocalı soyqırımı və Ermənistan-Azərbaycan arasında baş verən konfliktlərlə daha çox maraqlanan Henri Van Rens Qarabağın tarixi ilə bağlı yazmaq istədiyi kitabdan söz açıb. Kitabının Azərbaycanda çap edilməsini istəyən Henri həm də cavabsız qalan sualları ilə bağlı gileyindən söz açıb. O, Qarabağ problemi və Xocalı faciəsindəki reallıqlara biganə qalanlardan hələ də cavab gözlədiyini vurğulayıb.
“Çox təəssüflə deyəcəyəm ki, mən Qarabağın tarixi ilə kitab yazmaq istəyimi bildirərkən buna son dərəcə biganə yanaşıldı. Bilirsiniz, uzun müddətdir Qarabağın tarixi və orada Xocalıda baş verən soyqırımı ilə bağlı çox araşdırmalar aparmışam. Mən çox üzülürəm ki, mənə bu faktları üzə çıxarmaq üçün dəstək göstərilmir”.
Qonaq həmçinin kitabının Azərbaycanda çap edilməsindən də danışıb. O, kitabın satışından gələn gəlirin Qarabağda vuruşan qazilərimizə və şəhid ailələrinə həsr olunmasını istədiyini xüsusi olaraq vurğulayıb:
“Mən Qarabağın tarixi ilə bağlı yazmaq istədiyim kitabın Azərbaycanda çap edilməsini ürəkdən istəyirəm. Mən bir müddətdir ki, Beynəlxalq Avrasiya Mətbuat Fondu ilə əməkdaşlıq edirəm. Bu zaman ərzində bizim bir çox müzakirələrimiz olub. Ümidvaram kitabım işıq üzü görəndə onun ilk oxucuları məhz BAMF ailəsi olacaq.
Bir əsas məqamı da vurğulamaq istərdim ki, kitabın çapından sonra onun satışından əldə olunan vəsaitin şəhid ailələri və qazilər üçün yaradılan fonda köçürülməsini istərdim”.
Qonaq daha sonra Beynəlxalq Avrasiya Mətbuat Fondunun qarşıda təşkil olunan 30 illik yubileyində iştirak etmək istədiyini də vurğulayıb. Yazacağı kitabın ərsəyə gəlməsi üçün bir çox tarixi faktlara ehtiyac duyduğunu deyən H.V.Rens Azərbaycanda uzun müddət qalacağını da bildirib.
Daha sonra tərəflər gələcəkdə qarşılıqlı əməkdaşlıq haqqında geniş müzakirə aparıblar.
Elnur Ənvəroğlu
