“Birinci Qarabağ müharibəsini xatırlayıram. Mən tələbə ikən Birinci Qarabağ müharibəsində iştirak etmişdim. Bakı Dövlət Universitetini bitirdikdən sonra xidmətə yollandım. Xidmət zamanı şərəf hissi keçirirdim ki, Polad Həşimov Raquf Orucov kimi əfsanəvi qəhrəmanlarımızla birlikdə xidmət etdim”.
Bu sözləri Birinci Qarabağ müharibəsi veteranı, Vətən Müharibəsi iştirakçısı, jurnalist İlham Tumas Vətən müharibəsi xatirələrini Ednews-a danışarkən bölüşüb:
“Qələbəni görmək bizlərə nəsib olduğu üçün çox xoşbəxtəm. Bu ləkəni, xəcaləti çiynimizdən ata bildik. Azərbaycan xalqının qələbəsidir. Sentyabrın 27-i müharibənin başlanması bizdə böyük ümid yaratmışdı. Artıq nəşri dayanmış “Ekspress” qəzetində “Sevgilim Vətən” adı ilə silsilə köşələr yazırdım. Yazırdım ki, nə qədər Qarabağ azad deyil, biz nə mədəniyyətimizdən, nə idmanımızdan, nə iqtisadiyyatımızdan yarıyacağıq. Dəzgahda detal düzəldən bir fəhləmiz belə məğlubiyyət xəcalətiylə işləyəcək. Yazırdım ki, Qarabağ yalnız müharibə yoluyla azad oluna bilər”.
İ.Tumas sonda müharibəyə qatılmasaydım, özümü illər uzunu yalançılıqla məşğul olan biri kimi hiss edəckdim deyə bildirdi:
“44 günlük müharibə mənim 48 yaşıma təsadüf elədi. Hətta yeni yaşımı Cəbrayılda düşmən mina atanlarının mərmiləriylə qarşıladım. Xoşbəxtəm ki, illər uzunu arzuladığım müharibədə iştirak elədim, xoşbəxtəm ki, xəcalət yükünün çiynimizdən atılması üçün başlanan savaşda mənim də dəryada bir qətrə qədər payım oldu. İllər keçdi, şükür, Qarabağımız azaddır. Bunun üçün şəhidlərimizə borcluyuq. Onların haqqını qiyamətədək verə bilmərik. Bütün şəhid qardaşlarımızın ruhu qarşısında baş əyirəm!”.
Ayan Rzayeva