Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyindəki Əməyin Mühafizəsi Mərkəzi işğaldan azad olunmuş ərazilərdə fəaliyyət göstərən müəssisələrdə layiqli əməyin təminatına dövlət dəstəyi ilə bağlı maarifləndirmə tədbirlərinə start verib.
Tədbirdə Dövlət Əmək Müfəttişliyi Xidməti, Azərbaycan Respublikasının Minatəmizləmə Agentliyi, Beynəlxalq Avrasiya Mətbuat Fondu, eləcə də Nazirliyin tabeliyindəki Dövlət Məşğulluq Agentliyinin əməkdaşları iştirak edib.
2025-ci il üzrə ilk tədbir Füzuli rayonunda fəaliyyət göstərən 4 müəssisənin ümumilikdə 50 nəfərədək rəhbər və işçi heyətinin iştirakı ilə keçirilib.
Tədbir iştirakçıları layiqli əməyin təminatı sahəsində aparılan dövlət siyasəti, əmək qanunvericiliyinin tələbləri, əməyin mühafizəsi, iş yerlərində təhlükəsizlik standartları və mina təhlükəsizliyi qaydaları barədə məlumatlandırılıb. Eyni zamanda, tədbirin təşkilatçısı olan qurumların fəaliyyət istiqamətləri və əmək münasibətlərinə verdikləri dəstək barədə geniş məlumat verilib.
Əməyin Mühafizəsi Mərkəzinin işəgötürənlərə əməyin mühafizəsi və iş yerlərinin attestasiyası sahəsində göstərdiyi xidmətlər iştirakçıların diqqətinə çatdırılıb. Bundan əlavə, işəgötürənlərə əməyin mühafizəsi sahəsində təsdiq edilmiş yeni dövlət standartları haqqında ətraflı məlumat verilib.
Maarifləndirmə tədbirləri çərçivəsində iştirakçılara yaddaş kitabçaları, bukletlər və digər təlimat xarakterli materiallar təqdim olunub, həmçinin onların sualları cavablandırılıb.
Qeyd edək ki, işğaldan azad olunmuş digər ərazilərdə də maarifləndirmə tədbirlərinin keçirilməsi nəzərdə tutulur.
