Azərbaycan Respublikasının İqtisadiyyat Nazirliyi, Azərbaycan Respublikasının İxracın və İnvestisiyaların Təşviqi Agentliyi - AZPROMO və Azərbaycanın Böyük Britaniyadakı Səfirliyinin birgə təşkilatçılığı ilə Londonda işgüzar görüş keçirilib.

 “EDnews” xəbər verir ki , tədbirdə Azərbaycan və Böyük Britaniyada fəaliyyət göstərən iş adamları, menecerlər və müxtəlif sahələr üzrə mütəxəssislər iştirak ediblər. Görüşdə iki ölkə arasında ticarət və investisiya imkanları və əməkdaşlığın genişləndirilməsi məsələləri müzakirə olunub.

Tədbir zamanı “Oliver Wyman” şirkətinin baş icraçı direktoru Nik Studer bu il yanvarın 20-də Davosda Dünya İqtisadi Forumu çərçivəsində Prezident İlham Əliyevlə görüş keçirdiyini xatırladıb. O, görüşdən sonra Azərbaycan bazarında şirkətin təşəbbüslərinin qazandığı müsbət dinamikanı vurğulayıb. O, “Oliver Wyman”ın Azərbaycan hökuməti ilə uzunmüddətli tərəfdaşlığa sadiqliyini bir daha təsdiqləyərək, Bakıda regional mərkəz kimi fəaliyyət göstərəcək ofis açmağı planlaşdırıldığını bildirib. Bu mərkəz Qafqaz və Mərkəzi Asiya regionunu əhatə edəcək.

AZPROMO-nun icraçı direktoru Yusif Abdullayev çıxışında bu cür tədbirlərin ölkələrimiz arasında ikitərəfli işgüzar əlaqələrin möhkəmləndirilməsinə müsbət töhfə verdiyini bildirib. Yusif Abdullayev xaricdə yaşayan azərbaycanlı sahibkarlarla əlaqələrin gücləndirilməsinin vacibliyini də diqqətə çatdırıb.

Azərbaycanın Böyük Britaniyadakı səfiri Elin Süleymanov tədbirdə çıxışı zamanı qeyd edib ki, bu kimi görüşlər Azərbaycan ilə Birləşmiş Krallıq arasında iqtisadi və investisiya əməkdaşlığının daha da dərinləşməsinə mühüm töhfə verir.

Tədbirdə EBRD, HSBC, “Wasabi”, “Foresight Group”, “BNP Paribas” və bp kimi nüfuzlu şirkətlərin London ofislərində çalışan azərbaycanlı mütəxəssislər də iştirak ediblər. Onlar təmsil etdikləri sahələr barədə məlumat verib, həmkarları ilə fikir mübadiləsi aparıb və qarşılıqlı əməkdaşlıq imkanlarını müzakirə ediblər.

Fatimə Mərdanlı //EDnews