Milli Məclisin Elm və təhsil komitəsinin sədr müavini Musa Qasımlı ali təhsil müəssisələrinə qəbul qaydalarında dəyişikliklərin edilməsini təklif edib. Deputat universitetlərin hər kəs üçün əl çatan olması üçün qəbul prosesinin sadələşdirilməsini, təhsil prosesinin isə daha da ciddiləşdirilməsini təklif edib.
Təhsil eksperti Elşən Qafarov da deputatın fikirləri ilə həmfikir olduğunu bildirərək qəbul prosesində bir-sıra dəyişikliklərin zəruri olduğunu qeyd edib. O, bu barədə Ednews-a açıqlaması zamanı bildirib.
“Bildiyimiz kimi, ölkəmizdə çox uzun müddətdir ki, Dövlət İmtahan Mərkəzi tərəfindən ali təhsil müəssisələrinə qəbul imtahanları qruplar üzrə keçirilir. Bu isə doğru bir yanaşma deyil. Hesab edirəm ki, qəbul imtahanları mexanizmində ciddi dəyişikliklər edilməlidir. Dünyanın ikinci bir ölkəsində belə bir təcrübə yoxdur. Məhz imtahanların qruplar üzrə keçirilməsi üzündən Azərbaycanda 100 abituriyentdən 95 nəfəri istədiyi və arzuladığı ixtisasa nail ola bilmir. Məcburiyyət qarşısında düşdüyü, daha doğrusu istəmədiyi ixtisas üzrə təhsil almağa başlayır. Hətta elə ailələr var ki, maddi vəziyyətindən asılı olmayaraq övladlarının ali təhsil alması üçün ödənişli ixtisasları seçmək məcburiyyətində qalır. Onu da əlavə edim ki, verilən bəzi məlumatlara görə, təhsil haqqını ödəyə bilməyən 6000 -ə yaxın tələbə təhsildən kənarda qalıb”.
Ekspertin fikrincə, ali və orta təhsil müəssisələrinə qəbul imtahanları ixtisaslar üzrə keçirilməlidir.
“Bu mexanizmin tətbiqi hər bir abituriyentə öz istədiyi ixtisası və peşəni seçmək imkanı qazandıracaq. Hər bir gəncin öz qabiliyyətinə uyğun həmin peşə və ixtisas üzrə keyfiyyətli təhsil alması cəmiyyətə və dövlətə daha çox fayda verəcək. Dövlət İmtahan Mərkəzinin qəbul imtahanları qruplar üzrə yox, ixtisaslar üzrə keçirilməlidir”.
Elşən Qafarov, həmçinin ali təhsilin məzmununda və keyfiyyətində dəyişikliklərin edilməsini də zəruri hesab edib.
“Ali təhsil müəssisələri ölkənin inkişaf konsepsiyasına uyğun kadr hazırlaya bilmir. Bunun üçün mütləq ali təhsil ocaqlarında nəzəri biliklərlə yanaşı, praktiki biliklər də tədris edilməlidir. Bu zaman tələbələr hər tərəfli praktikaya sahib ola biləcəklər”.
Yunis Abdullayev