Bu günün ən aktual mövzularından biri də işə qəbul zamanı yaş həddinin olmasıdır. Bir çox iş yerləri işçiləri yalnız 35 yaşa qədər qəbul edirlər. Hətta bəzi müəssisələrdə xüsusilə qadınlara onların xarici görünüşünü əsas gətirərək işdən uzaqlaşdırırlar. Bu səbəbdən hazırda ölkədə iş müəssisələrinin bir çoxu işçinin 35 yaşa qədər vakansiya təyin edir.
İşə qəbul prosesində yaş faktoru yoxsa iş təcrübəsi önəmlidir ? Xarici ölkələrlə müqayisədə bizim ölkədə niyə bu kriteriyalara daha çox önəm verilir?
“ Bu gün bu kimi hadisələrin biz də şahidiyik. Artıq elə bir vəziyyətdir ki, 35 yaş da xüsusi rol oynamır”.
Bu sözləri Ednews-a açıqlamasında psixoloq Gülnar Orucova bildirib.
“Bəzi insanlar var ki, 30 yaşına kimi ehtiyacı olmadığına görə çalışmır, amma 30 yaşdan sonra çalışmaq qərarına gəlirlər. Bu kimi yaş faktorları həmin şəxslərin çalışmağına mane olur. Yaş məsələsindən əlavə şirkətlər xoş görüntü və iş təcrübəsi tələb edir. Bir insan öz ayaqları üzərində durmaq istəyir və buna dəstək olmurlar. Ən çox da özəl müəssisələrdə buna rast gəlinir. Biz ölkədə özəl müəssisələr avropasayağı hərəkət etməyə çalışırlar. Amma Avropaya nəzər salsaq mağazalarda 55 yaşlı satıcının işlədiyini görə bilərik. Dil biliyi tələb etmələri az deyilmiş kimi yaş və görünüş tələb edirlər”.
Psixoloq həmçinin bildirib ki, bizim ölkədə təqaüd yaşı 60- 65 yaş arasıdı. Amma 35 yaşdan sonra insanlar iş tapmaqda çətinlik çəkirlər.
“Əsas yaş, görünüş deyil, iş qabiliyyəti önəmlidir. Məgər bu gözəllik yarışmasıdır ki”?
Sosioloq Aynur Hacıyeva isə bildirib ki bu gün aktual mövzulardan biri də işə qəbul zamanı qabardılmış tələblərin olmasıdır.
“Bir çox işlərdə yaş həddinin 35 yaşa kimi olması, eyni zamanda xanım işçilərin tələb olunmasıdır. Burada kişilər iş tapmaqda çətinlik çəkir. Amma, bu o demək deyil ki, qadınların hər zaman rahat iş tapmaq imkanı var. Onlara da bir çox tələblər qoyulur. Yaş həddi, xoşagələn xarici görünüş… Bütün bunlar onun göstəricisidir ki, ölkədə iş tapmaq çox çətin məsələyə çevrilib. Nəticədə işsiz olan şəxslərin sayı artıb”.
Onun fikrincə, işə qəbul prosesi hər hansı bir qaydaya görə tənzimlənməlidir. Vakansiyaların əlçatan olması üçün şirkət və təşkilatlar yenilənmiş tələb və təklifləri ilə müraciət etməlidirlər.
Ayan Rzayeva