Dekabrın 26-da Beynəlxalq Ərəb Dili Günü münasibətilə Azərbaycan Dillər Universitetində tədbir keçirilib.
Tədbirdə Səudiyyə Ərəbistanı, Birləşmiş Ərəb Əmirlikləri, Qətər, Misir Ərəb Respublikası, İordaniya, Mərakeş, Liviya, Fələstin, Əlcəzair, İraq və Sudanın ölkəmizdəki fövqəladə və səlahiyyətli səfirləri, universitetin rektoru və bir çox rəsmi qonaqlar iştirak ediblər.
Tədbirdə çıxış edən rektor akademik Kamal Abdulla qonaqları salamlayaraq Beynəlxalq Ərəb dili günü münasibətilə onları təbrik edib. Ərəb dilinin əhəmiyyətinə toxunan rektor bu dilin Azərbaycanla ərəb ölkələri arasında müxtəlif sahələrdə mövcud olan əlaqələrin davam etdirilməsində önəmini vurğulayıb.
“Ərəb ölkələri ilə Azərbaycan arasında ulu öndər Heydər Əliyevin dövründə əsası qoyulmuş bu əlaqələr bu gün Prezident İlham Əliyevin uğurlu xarici siyasəti nəticəsində gündən-gündən inkişaf edir və möhkəmlənir”.
Daha sonra rektor işğaldan azad olunan Qarabağ torpaqlarında quruculuq işlərindən söz açaraq, ərəb ölkələrinin nümayəndələrini əməkdaşlığa dəvət edib.
“Siz yəqin ki, Qarabağın işğal zamanı necə dağıdılaraq xarabalığa çevrildiyini görmüsünüz. Biz bu gün bu torpaqları yenidən qurub, abadlaşdırmalıyıq. Ərəb dostlarımız hər zaman bizə dəstək olub və inanıram ki, bu quruculuq və yenidən bərpa işlərimizdə bizə hər zaman olduğu kimi dəstəyini göstərəcək”.
Tədbirin davam edən hissəsində Mərakeş Krallığının fövqəladə və səlahiyyətli səfiri Məhəmməd Adil Embarş çıxış edib. O, ölkəmizdə ərəb dilinə göstərilən sevgi və diqqətə görə Azərbaycan xalqına öz təşəkkürünü bildirib. Səfir ərəb dilinin bütün dünyada beynəlxalq əhəmiyyət daşıdığını bir daha qeyd edib.
“Hər il Azərbaycanın təhsil ocaqlarında Beynəlxalq Ərəb Dili Gününün təntənəli şəkildə keçirilməsi diqqətəlayiq hadisədir. Mən buna görə bir daha Azərbaycan Dillər Universitetinin rəhbərliyinə, tələbələrə və tədbirin iştirakçılarına öz minnətdarlığını bildirirəm”.
Tədbir universitet tələbələrinin ərəb və azərbaycan dillərində hazırladıqları ədəbi-bədii kompozisiya ilə davam edib. Müxtəlif ərəb ölkələrinin mədəniyyətini əks etdirən rəqs nümunələri təqdim olunub, şeir və musiqi parçaları səsləndirilib. Həmçinin tələbələrin təqdimatında ərəb ölkələrinin milli geyim nümunələri nümayiş etdirilib.
Sonda tədbirin təşkilatçısı, filologiya üzrə fəlsəfə doktoru, ərəbşünas Ülviyyə Hüseynova çıxış edərək gələn qonaqlara öz təşəkkürünü bildirib. O, qeyd edib ki, ərəb dili hər zaman dünyada vacib dillərdən hesab olunub. Ü.Hüseynova son zamanlar gənclər arasında ərəb dilinə artan maraqdan da söz açıb. O, xüsusi olaraq vurğulayıb ki, gələcəkdə ərəb dili mərkəzlərinin sayının artacağına ümid bəsləyir.
Daha sonra Ülviyyə Hüseynova tələbələri və qonaqları səfirliklərin hazırladıqları stendlərə baş çəkməyə dəvət edib. Stendlərdə ərəb ölkələrinin müxtəlif təamları, mədəni irsləri, tarixi və dini kitabları və müxtəlif milli atributları nümayiş olunub.
Nümayiş olunan ən maraqlı stendlərdən biri də Birləşmiş Ərəb Əmirliklərinin idi. Burada ölkəyə aid turistik məlumatlar, tarixi və dini kitablar və milli atributlar nümayiş ounurdu. Qonaqlara mill yeməklər və şirniyyatlar təklif olunurdu.
Qeyd edək ki, UNESCO tərəfindən 18 dekabr Beynəlxalq Ərəb Dili Günü elan edilib və 2012-ci ildən etibarən hər il qeyd edilir. Məqsəd BMT-nin bütün rəsmi dillərinin bərabər istifadəsini təşviq etməkdir. 1973-cü il 18 dekabrda BMT Baş Assambleyası Ərəb dilini BMT-nin altıncı rəsmi dili olaraq qəbul edib.
Törə Zeynallı
