Pandemiya dünyada turizmin inkişafına ciddi zərbə vursa da son illərdə bu sahə dirçəlməkdədir. Azərbaycandan yeni istiqamətlərə aviareyslərin açılması, turizm şirkətlərinin cəlbedici təklifləri vətəndaşların müxtəlif ölkələrə istirahətə üz tutmasına imkan yaradır. Bəs son illərdə azərbaycanlı turistlərin ən çox getdiyi məkanlar hansılardır?
Bu barədə turizm sahəsi üzrə ekspert Əziz Şiriyev Ednews-a açıqlamasında bildirib ki, azərbaycanlıların ən çox səyahət ediyi ölkələrin başında Türkiyə gəlir:
“Erkən rezervasiya, hissə-hissə ödəniş imkanı və endirimli qiymətlərlə hərşey daxil tur paketlər, eləcə də dil, mədəniyyət uyğunluğu Antalya, Bodrum, Marmaris, İstanbul kimi istiqamətlərə səyahətləri daha asan və sərfəli edir. Ən çox səyahət edilən ikinci şəhər isə Şarm əl Şeyxdir. Vizasız rejim, 500-700 dollar arası dəyişən sərfəli tur paketlər, ilin çox hissəsinin günəşli keçməsi, çimərlik mövsümünün aktiv olmağı buranı son illərdə azərbaycanlı vətəndaşlar üçün cəlbedici edib. Dubaya gedənlərin də sayı artıb. Buraya təşkil edilən turlarda hər şey daxil otel sistemi olmasa da insanlar daha çox şəhəri gəzməyə üz tuturlar. Dubayın texnologiyalar, yeniliklər şəhəri olması da insanlarda maraq yaradır. Bahalı telefonları orada iki-üç qat ucuzuna əldə edə bilirlər. Alqı-satqı ilə məşğul olan şəxslər üçün Dubay həm də biznes şəhəridir”.
"Avropaya getmək istəyən insanların sayı artsa da əksər ölkələrin Şengen vizası tələbi və təyyarə biletlərinin baha olması gediş-gəlişi çətinləşdirir. Yeni ailə quran cütlüklər arasında isə bal ayı üçün Maldiv adalaları, Bali, Şri-Lanka kimi yeni istiqamətlərə üz tutanlar var. Gürcüstanla quru sərhədlərin bağlı olması, təyyarə biletlərinin bahalaşması oraya gedən turistlərin sayına təsir etsə də yenə də əsas istiqamətlərdən biri olaraq qalır”, ekspert qeyd edib.
Azərbaycanlı turistlərin daha çox passiv istirahətə üstünlük verdiyini deyən ekspert bunun səbəblərinə də toxunub:
“Səbəblərdən biri odur ki, passiv istirahətdə bir dəfə ödəniş edib, təyyarə biletindən otelə qədər hər şeyi əldə edirlər. İstirahət dedikdə çoxunun ağlına ancaq 5 ulduz otellərdə qalmaq, qidalanmaq, çimərlik və əyləncə gəlir. Aktiv istirahət isə məlumat, planlama, enerji gərəkdirir. Tarixi yerlər, muzeylər, fərqli məkanlar və müxtəlif aktiv əyləncələr azərbaycanlı turistlər üçün elə də maraqlı olmur. Bunun digər bir səbəbi də daha çox maliyyə tələb etməsidir”.
Törə Zeynallı