“Türkiyədən yüksək təhsilli oğul gözləyən, toya hazırlaşan ailəmiz bu gün Gündüz üçün Sumqayıtda babasının qəbrinin yanında məzar yeri qazdırıb dəfn edəcəyik”.
Bu sözləri Ednews-a Malatya şəhərində zəlzələ zamanı dağılan binanın altında qalan 4 azərbaycanlı tələbələrdən Gündüz Nəzərzadənin bibisi Hicran xanım bildirib. Bu gün Gündüzdən danışmaq onun üçün çətin, ağrılı-acılı olsa da o sözlərini davam etdirməyə çalışır, səsi titrəyir.
“Sonuncu dəfə nənəsi ilə danışıb, deyib nənə, get, rəqs öyrən, gəlirəm toyumdur. Gündüzün ürəyində böyük arzusu var idi – toy etmək. Gündüzün Türkiyədə bəyənib seçdiyi Türk qızı var idi. Tezliklə onu Bakıya gətirəcəkdi, toy edəcəkdi nənəsi də qol qaldırıb onun toyunda oynayacaqdı. Ailəlikcə sevinəcəkdik, çox heyf bu gün biz Gündüzü dəfn etməyə hazırlaşırıq”.
Söhbət zamanı Gündüzün bibisi bildirib ki, o, təhsilini başa vurduqdan sonra vətənə qayıdıb burada peşəsini davam etdirmək istəyirdi.
“Gündüz Azərbaycan Tibb Universitetini bitirmişdi. Daha sonra ixtisas artırmaq üçün Türkiyəyə getdi. Vətəninə uzman həkim kimi qayıtmaq istəyirdi. Bu Gündüzün istəyi idi, biz taleyin çizəcəyi yoldan xəbərsiz idik. Gündüz çox agıllı, imanlı, savadlı övlad idi. O, qardaşımın ilk övladı, ilk nəfəsi idi. Ailəmizin qürur yeri, fəxrimiz idi. Hərdən ona baxanda düşünürdüm ki, Gündüz bu dünya üçün çox təmizdir”.
Hicran xanım qeyd edir ki, atası, yəni Gündüzün babası vəfat edəndə öz vəsiyyətini ona etmişdi.
"Atam il yarım olar ki, rəhmətə gedib. Ölümündən 1 gün əvvəl Gündüzü yanına çağırdı. Dedi atanı sənə vəsiyyət edirəm. Mən öləndən sonra onu fikir etməyə qoyma. Amma, Gündüz Atamın vəsiyyətini yerinə yetirmədi. Əksinə,ölümü ilə qardaşımın belini qırdı".
Gündüzün qaldığı otağından Azərbaycan və Türkiyənin bayraqları, bir də müqəddəs Quran kitabı tapılıb. Bibisi deyir ki, Nəzərzadə ailəsi hər zaman Allaha bağlı olub.
“Qardaşım Mübariz bu dərdin qarşısında şam kimi ərisə də, inanın bizi sakitləşdirmək, təsəlli vermək üçün deyir ki, verəndə Allahdır, alanda Allah"
Hərdən onun bu səbrini, sakitliyini fırtına öncəsi səssizlik kimi qəbul edirəm, onun üçün çox qorxuram”.
Zinyət Dövlət qızı