Bu gün Cenevrə Geostrateji Rəsədxanasının baş katibinin müavini, Cenevrə Ruhani Assosiasiyasının vitse-prezidenti Ventzeslav Sabev Beynəlxalq Avrasiya Mətbuat Fondunun qonağı olub.
Ednews xəbər verir ki, qurumun prezidenti Umud Mirzəyev Cenevrə Geostrateji Rəsədxanasının rəsmisini BAMF-ın baş ofisində qəbul edib. U.Mirzəyev ilk olaraq qonağa BAMF-ın yaranma tarixindən, 30 ildə görülən işlərdən bəhs edib.
Ventzeslav Sabev Umud Mirzəyevə bu görüş üçün öz təşəkkürünü bildirib:
“Bu görüşün həqiqətən məhsuldar bir görüş olacağına heç şübhəm yoxdur. Çünki sizin təşkilatın hələ də ayaqda qalması çox maraqlı bir hadisədir. İstər Şərqi, istər Qərbi Avropa, istərsə də Asiya olsun, hər yerdə müxtəlif növ fəaliyyətlərlə məşğul olan Qeyri hökumət təşkilatları ilə rastlaşmışam. Həmin təşkilatların ömrü uzaq başı 10 il olub, ondan sonra oların hamısı müxtəlif səbəblərdən fəaliyyətlərini dayandırıblar. Lakin sizin təşkilatınız artıq 30 ildir ki, fəaliyyətdədir və kifayət qədər də maraqlı və yaradıcı işlər görürsünüz.”
U. Mirzəyev öz növbəsində qonağa təşkilatın yaranması ilə bağlı 90-cı illərin əvvəlində Azərbaycanda, o cümlədən Qafqaz və post-Sovet məkanlarında obyektiv informasiyaya duyulan ehtiyacdan bəhs edib.
“O zamanlar çox çətin dönəm idi. İnsanlar çox ağır şəraitdə yaşayırdılar. Qaçqın və məcburi köçkünlərin kimisi bizim vasitəmizlə səslərinin dünyaya duyrulmasını, bəziləri yaşamaq üçün kiçik də olsa bir daxmasının olmasını istəyirdilər. Onların hətta bir tikə çörəyə belə ehtiyacları var idi. İnsanların çarəsizcəsinə bizə üz tutması bizim bu cür təşkilatı yaratmamıza vəsilə oldu”.
BAMF rəhbəri həmçinin təşkilatın yaranma səbəblərini izah edərkən ölkədəki hadisələrin dünya ictimaiyyətinə doğru-dürüst çatdırılması üçün post Sovet məkanında bu cür təşkilatların yaradılmasına ehtiyacın olmasından da bəhs edib.
Görüşdə BAMF və Cenevrə Geostrateji Rəsədxanasınınnın birgə həyata keçirəcəyi fəaliyyətləri və gələcək əməkdaşlıq perspektivləri də müzakirə olunub. Qonaq gələcək əməkdaşlıq üçün çox ümidli olduğunu da qeyd edib.
Sonda xatirə şəkli çəkdirilib.
Ülviyyə Şahin
.jpg)
