Təhsil naziri Emin Əmrullayev tədris ilinin sentyabrın 1-dən başlamasını təklif edib. Nazirin sözlərinə görə, tədris ili nə qədər uzun olarsa, bu, uşaqların gələcəyi üçün daha yaxşı olardı:
"İnkişaf etmiş ölkələrdə tətillər yayda yox, qışdadır. Bizdə isə üç aylıq tətil müddəti var. Təhsil işçisi olaraq bildirim ki, tədris müddəti nə qədər çox olsa, o qədər yaxşı tədris olar. Fikrimcə, məktəblərdə tədrisin sentyabrın 1-dən başlaması daha uyğun olardı. Bu, sadəcə istəkdir”.
Tədris ilinin dəyişdirilməsi məsələsi sosial şəbəkələrdə də geniş müzakirələrə səbəb olub. Bu tarixin dəyişməsini istəyən də var, istəməyən də.
Xatırladaq ki, Azərbaycanda tədris ili 2015-ci ildən etibarən ümumtəhsil məktəbində dərslər sentyabrın 15-də başlayıb, iyunun 14-də bitir.
Bu dəyişiklik tətbiq olunan zamandan artıq 8 ildir ki, gündəmdən düşmür. Mövzu dəfələrlə də Milli Məclisin plenar iclaslarında da müzakirə edilib. Parlament üzvləri qeyd edib ki, dərslər sentyabrın 1-də başlasa, həm müəllimlər, həm də valideyn və şagirdlər üçün yaxşı olar. Çünki tədris ilinin iyunun 15-nə qədər davam etməsi isti hava ilə əlaqədar müəyyən çətinliklər yaradır.
Yeni tədris ilinin 1 sentyabrda başlaması ehtimalı nə qədər həqiqətə uyğundur? Bəs, təhsil ekspertləri və valideynlər bu barədə nə düşünür?
Məsələ ilə bağlı Ednews-a danışan təhsil eksperti Elşən Qafarov qeyd edib ki, nazir Emin Əmrullayev bir ekspert kimi tədrisin ayın 1-dən başlamasını təklif edib. Lakin...
“Ümumtəhsil məktəblərində dərslərin sentyabrın 1-də başlayıb mayın 25-də yekunlaşacağı barədə yayılan xəbərlər əsassızdır. Prezidenti İlham Əliyevin "Azərbaycan Respublikasında "Bilik günü"nün təsis edilməsi və təhsil müəssisələrində iş rejiminin tənzimlənməsi haqqında” 21 avqust 2004-cü il tarixli 114 nömrəli Fərmanı ilə 15 sentyabr "Bilik günü” elan edilib və Respublikanın bütün təhsil müəssisələrində dərslərin sentyabrın 15-dən başlanması müəyyən edilib. Bu səbəbdən də 2015-ci ildə tətbiq olunan qanun öz hüquqi çəkisini qoruyub saxlayır. Hələ ki, heç bir dəyişiklik yoxdur”.
Valideynlər isə...
Onların böyük qismi düşünür ki, iyun ayında şagirdlər dərsə getmək, dərs hazırlamaq üçün çox həvəssiz olurlar.
“Müşahidələrimiz göstərir ki, isti havalar uşaqlara pis təsir edir. onların dərsə gəlməsini çətinləşdirir, istirahət etmək istəyirlər. Məncə, dərslər sentyabrın 1-i başlayıb mayın 31-də yekunlaşsa şagirdlər üçün daha yaxşı olar”.
Məsələ ilə bağlı Ednews-un sorğusuna cavab olaraq Elm və Təhsil Nazirliyindən bildirilib ki, 1-14 iyun tarixləri yaz fəslinə təsadüf etdiyindən iyun ayında dərslərin keçilməsi hava şəraiti baxımından heç bir çətinlik törətmir. Yəni rəsmi olaraq dərslər sentyabrın 15-i başlayıb, iyunun 14-də bitəcək.
Aytac Həsənova