Xəbər verdiyimiz kimi bu gün Yasamal rayonu İnşaatçılar prospektində yerləşən yaşayış binasında yanğın baş verib.
Fövqəladə Hallar Nazirliyindən verilən məlumata görə, dam örtüyü yanan binanın dörd mərtəbəsi yaşayış üçün nəzərdə tutulub, yuxarı qatı isə sonradan tikilib. Əvvəllər dəhliz olan üst qat bir müddət hətta emalatxana kimi də fəaliyyət göstərib.
Baş verən hadisə binalara sonradan, bəzənsə icazəsiz əlavə edilən tikililərdə təhlükəsizlik məsələsini yenidən müzakirə etməyə əsas verir.
“İstənilən bina inşa edilərkən onun layihəsi hazırlanır. Binanın geologiyasına uyğun olaraq konstruksiyası, bunun əsasında da konstruktiv planı hazırlanır. Binanın üzərinə hər hansı qurğuların qoyulması, tikililərin əlavə olunması onun qəzalı vəziyyətə düşməsinə səbəb ola bilər”.
Bu sözləri məsələ ilə bağlı Ednews-a açıqlamasında memar, inşaat üzrə ekspert Muxtar Ərturan bildirib. O qeyd edib ki, bina nəzərdə tutulduğundan artıq yüklənərsə, bədbəxt hadisə qaçılmaz ola bilər.
“Binanı bir gəmi olaraq təsəvvür edin, yükdaşıma qüvvəsi 10 adamdır, ora 15 adam minəndə artıq batma ehtimalı çoxalır. Binanın fundamenti də eynilə gəmi kimi, daha artıq yükə hesablanmayıb. Bu zaman binada mikro çatlar və geniş çatlar əmələ gələ bilər”.
Ekspertin sözlərinə görə, hər bina təyinatı üzrə tikilir. Əgər bu, fabrik, zavoddursa təyinatı da ona uyğun olur, əgər yaşayış binasıdırsa, təyinatı fərqli olur.
“Heç bir halda bir bina həm yaşayış, həm də digər məqsədlər üçün nəzərdə tutula bilməz. Yəni bir bina həm yaşayış, həm də qeyri-yaşayış təyinatlı ola bilməz. Yaşayış nəzərdə tutulan binalarda sakinlərin təhlükəsizliyi məsələsi öndə gəlir. Zavod, fabrik və ya qeyri-yaşayış təyinatlı obyeklərdə isə qəza, yanğın təhlükəsizliyi riski daha yüksəkdir. Əgər binanın üst qatında əlavə tikililər inşa edilibsə, bu, qanundan kənar bir addımdır. Buna qarşı qanunda müvafiq tədbirlər nəzərdə tutulub. Yaşayış binasında emalatxana tipli yerlər tikilməməlidir. Bu, memarlığa da, qanuna da ziddir. Uşaq baxçasının içində yanacaq doldurma məntəqəsinin olmasına bənzəyir”.
M.Ərturan əlavə edib ki, üst qatda inşa edilən əlavə tikililərdə yüngül materialdan istifadə edirlər, bu da yanğına səbəb olur.
“Düşünürlər ki, yüngül material konstruksiyaya ziyan vurmur, metal konstruksiya edirlər. Nəzərə almırlar ki, sabah bu, yanğına səbəb ola bilər. Daşın yanma ehtimalı çox azdır. Yüngül konstruksiyanın alışma və yanma ehtimalı isə 60-70 faiz daha yüksəkdir”.
Törə Zeynal
