Vətən müharibəsinin 21-ci günü - 2020-ci oktyabrın 17-si hərb tariximizə Füzuli şəhərinin və ətraf kəndlərin erməni işğalından azad edildiyi gün kimi yazıldı. Prezident İlham Əliyev 2023-cü il iyulun 31-də imzaladığı Sərəncama əsasən Füzuli şəhərinin işğaldan azad edildiyi 17 oktyabr tarixi Füzuli şəhəri günü kimi qeyd olunur.
“Füzuli bir açar idi və onun işğaldan azad olunması müharibənin sonrakı taleyini həll etdi. Hər kəs fərqində idi ki, artıq Azərbaycan Ordusunu dayandırmaq mümkün deyil, Silahlı Qüvvələrimiz qələbəyə doğru gedir”.
Bu fikirləri Beynəlxalq Avrasiya Mətbuat Fondunun Prezidenti Umud Mirzəyev Ednews-a danışarkən səsləndirib. O, qeyd edib ki, bu gün münasibətilə hər kəsə təbrik payı düşür, ancaq ilk olaraq Ali Baş Komandanımıza və müzəffər Azərbaycan Ordusuna xüsusu təşəkkür etməliyik.
“Bu əlamətdar günü Ölkə Prezidenti ilə birgə qeyd etdik. Cənab prezidentin başçılığı ilə Füzulinin ziyalıları, şəhid ailələri, ictimai xadimləri ilə görüş keçirilirdi. Prezidentimiz tarixi mesalar verdi. Xankəndi, Xocalı, Xocavənd, Ağdərə, Əskəran və digər bölgələrimizlə bağlı mesajlar verdi. Xüsusən Xankəndini deyərdim. Bu ilin sonunadək 800 ailə Füzuli şəhərinə qayıdacaq. İnşallah bundan sonra gözəl günlər görəcəyik".
BAMF rəhbəri 2 il öncə Prezident İlham Əliyevlə görüşü də xatırladıb:
“Dövlətimizin başçısı təxminən 30 nəfərlik bir heyətlə Füzulinin yenidən qurulmasının təməlini qoydu. Füzulidə keçirilən təməlqoyma mərasimində iştirak etdiyim üçün özümü şanslı sayıram”.
”Füzuli ən ağır döyüşlərin getdiyi məkan idi. Ermənilərin ən çətin keçilə biləcək səngərləri, dillər əzbəri olmuş “Ohanyan səddi” burada qurulmuşdu, hərbi birləşmələri daha çox bu istiqamətdə yerləşmişdi. Füzulini itirmək Ermənistanın terrorçu hərbi birləşmələrinin belinin qırılması demək idi. Ali Baş Komandanın da qeyd etdiyi kimi “Biz öz Zəfər missiyamızı məhz Füzuli rayonundan başlamışıq”. Məhz Füzuli bizi möhtəşəm Qələbəyə apardı”.
U.Mirzəyev 30 il ərzində ekoloji terrora məruz qalan Füzuli şəhərində hazırda böyük quruculuq işlərinin getdiyini, doğma torpaqlara yenidən gözəl günlərin qələcəyini də qeyd edib.
“Erməni separatçıları uzun illər şəhəri tamamilə viran ediblər, yaşayış binaları ilə bərabər, tarixi-mədəni abidələr də dağıntılara məruz qalıb. Şəhərin təbiəti, ağaclar və yaşıllıqlar, su mənbələri, kəhriz və bulaqlar məhv edilib. Lakin Füzuliyə həyat qayıdır. Beynəlxalq hava limanı, Şuşaya çox rahat yol inşa edilib, işıq, su və digər infrastruktur layihələri həyata keçirilir. Bunların hamısı bir füzulili olaraq məni çox qürurlandırır. Bundan sonra da Füzuli günü-gündən inkişaf edəcək. Füzulidə inşa olunan Mirzə Uluqbəy adına 1 nömrəli tam orta məktəbin təməlini qoyuldu. Füzuli şəhərində Özbəkistan hökuməti tərəfindən hədiyyə olaraq orta məktəb inşa olunub. Bu tarixi hadisə Azərbaycan və Özbəkistan arasında dostluq, qardaşlıq münasibətlərini daha da möhkəmləndirəcək. Füzulidə tikilən Mirzə Uluqbəy adına 1 nömrəli tam orta məktəb Füzulilər, Nəsimilər, Nizami Gəncəvilər yetişdirəcək”.
U.Mirzəyevin sözlərinə görə, Füzuli azad edilmiş rayonlar arasında minaların sayına görə ən çox çirkləndirilmiş rayondur – burada yüz mindən çox mina basdırılıb:
“Bu da quruculuq işlərində müəyyən əngəllər törədir. Buna baxmayaraq, orada aparılan bütün quruculuq işləri dövlətimizin başçısının nəzarəti altındadır. ANAMA, Mina İcma Aksiya komandamızla birgə mina ilə bağlı işlərimiz, layihələrimiz davam etdirilir. İnşallah ki, torpaqlarımızı mina bəlasından təmizləyəcəyik”.
Oğuz
