Xəbər verdiyimiz kimi, Bakıda tramvay və metrobus ictimai nəqliyyat növləri yaradılacaq. Bu, Bakı şəhərinin 2040-cı ilədək inkişafına dair Baş planında əksini tapıb.
Qeyd edilib ki, mövcud metro nəqliyyatı sistemi yüksək sərnişindaşıma qabiliyyətinə malik ictimai nəqliyyat sistemində aparıcı rol oynamağa davam edəcək. Lakin, metronun tikinti xərclərinin yüksək olması və tikinti işlərinin gec icra olunması yalnız şəhərətrafı ərazilərdə deyil, eyni zamanda şəhər daxilində də tamamlayıcı ictimai nəqliyyat sistemlərinin tətbiqini şərtləndirir.
Proses tezliklə başlayacaq? Tramvay və metrobus nəqliyyat vasitələrinin olması tıxac problemlərini aradan qaldıracaq?
Məsələ ilə bağlı Ednews-a açıqlamasında nəqliyyat üzrə eksper Ərşad Hüseynov bildirdi ki, Baş plan kağız üzərində yazılmış bir şeydir. Kağız üzərində hər şey yazıla bilər. Əsas məsələ orada yazılanları həyata keçirməkdir:
“Baş planda nəqliyyatla, infrastrukturla bağlı məsələlərə diqqət yetirəndə görürük ki, qeyd olunanlar realdır. Həyata keçirməsi mümkün olan məsələlərdir. Çünki Bakı kimi şəhərlərdə bunu çoxdan və kifayət qədər qısa müddətdə reallaşdırırlar. Amma baş planda yazılanlar 16 illik müddətdən söhbət gedir. Həyata keçiriləcəyinə qalsa bu praktikda görüləcək işlərdən asılıdır. Burada da bir neçə istiqamət var. Ən vacibi investisiya məsələləridir. Ümid edək ki, Nazirlər Kabineti bu planı təsdiq edəndə arxasında iqtisadi əsaslandırmalar da olub. Kifayət qədər təşkilati, texniki və.s məsələlər də olub. 16 illik müddətdə orada icra olunanlara nə qədər sərmaye lazımdır, o sərmayelər hansı mənbələrdən alınacaq və necə istifadə ediləcək. Əgər bu proseslər yaxşı hesablanıbsa və planda göstərildiyi kimi icra olunsa nəqliyyat məsələlərində işlər yaxşı olacaq. Şəhərin baş planında elə şeylər var ki, onların yaradılması üçün özəl biznes cəlb olunmalıdır və cəlb olunacaq da”.
Ekspert qeyd etdi ki, tramvay xəttləri açılacaq, tıxaclar həll olunacaq, məsələsi deyil:
“Tramvay xəttləri, metrobus da düzəldilmədi. Mövcud metro şəbəkəsi ciddi surətdə və dəfələrlə genişləndirilməlidir. 2040-ci ilə qədər cəmi 46 stansiyaya çatdırmaq istəyirlər, amma Bakı üçün bu rəqəm çox azdır. Avropada, Yaponiyada, Çində 200-dən çox stansiya var. Bizdən 5 dəfə artıqdır. Bütün bunlar hamısı paralel yerinə yetirilə bilsə onda irəliləyiş görə bilərik. Bu prosesə tezliklə başlanılmalıdır. Sərmayelər qoyulmalı, işlər görülməlidir. Cəmiyyət görməlidir ki, artıq uzağa perespektivə hesablanmış addımlar atılır”.
Oğuz