Azərbaycanda turizm polisinin yaradılması təklif olunur. Bu təklifi Azərbaycan Turizm Agentlikləri Assosiasiyasının təşkilatçılığı ilə “Turizm sənaye subyektlərinin ilin yekunları və COP29 ərəfəsində çağırışlar” forumunda Azərbaycan Turizm Bloqerləri Assosiasiyasının İdarə Heyətinin üzvü Mirsəməd Cəfərli verib.
Maraqlıdır, turizm polisi nədir? Bu sahə üçün seçilən polislərin konkret vəzifəsi nədən ibarət olacaq? Polisləri Daxili İşlər Nazirliyimi təyin etməlidir?
Məsələ ilə bağlı Ednews-a danışan turizm eksperti Cabir Dövlətzadə Azərbaycanda turizm polisinə ehtiyyat olmadığını bildirib.
“Turizm polisləri ölkəyə gələn turistlər arasında asayişi qorumaq və onları lazımi qaydada bilgiləndirmək üçündür. COP29-un Azərbaycanda keçiriləcəyini nəzərə alsaq, bu təklif əslində məntiqli səslənir. Buna baxmayaraq, düşünürəm ki, Azərbaycanda polislər olduqca peşəkər şəkildə fəaliyyət göstərir. Buna görə də, düşünmürəm ki, ölkədə turizm polislərinə ehtiyac olsun. Misal üçün İranda siyasi rejimə uyğun olaraq əxlaq polisləri fəaliyyət göstərir ki, onlar xüsusi olaraq ölkə məqsədlərinə xidmət edir. Lakin, Azərbaycana multikultural bir ölkə kimi turizm polislərinə gərək duymur.
Turizm polislərinin əsas funksiyaları turistlərlə maraqlanmaqdan ibarətdir. Bu polislər gərək mütləq ingilis dilində bilsin və xarici vətəndaşlarla əlaqə qurmaqda çətinlik çəkməsin. Əgər bu təklif həyata keçirilərsə, gərək həm qadın, həm də kişilər turizm polisi olaraq işləsin. Fikrimcə, Azərbaycan polisi gələn turistlər arasında asayişi qorumağa kifayət qədər qadirdir. Bütün bunlara rəğmən, təklifin ortaya atılması məntiqli bir hadisədir və təklifin qəbul edilməsi ölkə üçün heç bir zərər vurmaz”.
Fərid Axund