2023-cü ildə dövlət büdcəsinin gəlirlərinin formalaşdırılması istiqamətində Naxçıvan Baş Gömrük İdarəsi üzrə müəyyən olunmuş 64 milyon 494 min manat proqnoza qarşı hesabat dövründə 90 milyon 501 min manat vəsaitin toplanıb, illik proqnoz-tapşırıq 140,3 faiz yerinə yetirilib.
Ednews xəbər verir ki, bu barədə Azərbaycan Dövlət Gömrük Komitəsinin Naxçıvan Baş Gömrük İdarəsində 2023-cü il ərzində görülmüş işlər və cari ildə qarşıda duran vəzifələrlə bağlı tədbirdə deyilib.
Bildirilib ki, Baş İdarənin rəisi, gömrük xidməti general-mayoru Vüqar Əliyev çıxış edərək Azərbaycan Respublikası Dövlət Gömrük Komitəsində 2023-cü ilin yekunlarına həsr olunmuş kollegiya iclasında müzakirə olunan məsələlər və qarşıda duran hədəflər barədə şəxsi heyətə məlumat verib. Qeyd olunub ki, ötən il ərzində Naxçıvan Muxtar Respublikasında gömrük işi sahəsində dövlət siyasətinin həyata keçirilməsi istiqamətində görülən işlər, əldə olunan nailiyyətlər son dövrdə gömrük orqanlarında aparılan islahatlarla birbaşa bağlıdır.
Baş İdarə rəisinin müavini, gömrük xidməti kapitanı Rəşad Bayramov 2023-cü ildə görülmüş işlərlə bağlı hesabat məruzəsi ilə çıxış edib. Vurğulanıb ki, ötən il ərzində Naxçıvan Baş Gömrük İdarəsi tərəfindən qeydə alınan idxal əməliyyatlarının həcmi 130 milyon 906 min ABŞ dolları, ixrac əməliyyatlarının həcmi isə 14 milyon 601 min ABŞ dolları dəyərində olub. 2022-ci ilin eyni dövrü ilə müqayisədə idxalın həcmi 1,04 dəfə, ixracın həcmi isə 1,5 dəfə artıb. Hesabat dövrü ərzində qanunvericiliyə əsasən 42 milyon 215 min ABŞ dolları dəyərində olan mallar, yəni ümumi idxalın 32 faizi idxal gömrük rüsumlarından, 17 milyon 15 min ABŞ dolları dəyərində olan mallar isə, yəni ümumi idxalın 13 faizi əlavə dəyər vergisindən azad edilib.
Həmçinin, Naxçıvan Baş Gömrük İdarəsi tərəfindən ötən il ərzində arxivlənən bəyannamələr və qeydə alınan nəqliyyat vasitələri üzrə 103 milyon 641 min manat məbləğində gömrük ödənişləri toplanıb. Toplanılmış gömrük ödənişləri 2022-ci ilin eyni dövrü ilə müqayisədə 45 milyon 234 min manat və ya 44 faiz çoxdur. 2023-cü ildə dövlət büdcəsinin gəlirlərinin formalaşdırılması istiqamətində Baş İdarə üzrə müəyyən olunmuş 64 milyon 494 min manat proqnoza qarşı hesabat dövründə 90 milyon 501 min manat vəsaitin toplanıb, illik proqnoz-tapşırıq 140,3 faiz yerinə yetirilib.
Qeyd olunub ki, “Naxçıvan Muxtar Respublikasının 2023-cü il büdcəsi haqqında” Qanunu ilə müəyyən olunmuş yol vergisi üzrə 1 milyon 150 min manat proqnoza qarşılıq 11 milyon 985 min manat və ya 1042 faiz artıq, “İcazə” blankına görə dövlət rüsumu” üzrə 270 min manat proqnoza qarşı 1 milyon 156 min manat və ya 428 faiz artıq olmaqla ümumilikdə Baş İdarə tərəfindən 13 milyon 141 min manat məbləğində vəsait Naxçıvan Muxtar Respublikasının büdcəsinə köçürülüb, bu da muxtar respublikanın 2023-cü il büdcə gəlirlərinin 7,1%-ni təşkil edib.
Konsiqnasiya yolu ilə ixrac olunan mallardan yaranmış borcun geri qaytarılması istiqamətində görülmüş tədbirlər nəticəsində ümumilikdə 8 milyon 976 min ABŞ dolları məbləğində borcun 100 faizinin hüquqi və fiziki şəxslərin müvəkkil bankdakı hesablarına köçürülməsi təmin olunub.
Tədbirdə Baş İdarənin Əməliyyat və İstintaq İdarəsinin rəisi, gömrük xidməti polkovniki Novruz Hacıyev qeyd edib ki, 2023-cü ildə muxtar respublikanın gömük orqanları tərəfindən 64 cinayət faktı aşkarlanıb. Narkotik vasitələrin, psixotrop və güclü təsir edən maddələrin qaçaqmalçılığı ilə bağlı 60 cinayət işi açılıb. Narkotik qaçaqmalçılığı faktları üzrə ümumilikdə 568 kq 585 q heroin, 144 qram həşiş qətranı, 118 qram marixuana, 112 qram tiryək, 145 qram psixotrop maddələr, 136 qram güclü təsir edən maddələr qanunsuz dövriyyədən çıxarılıb. Ötən ilin eyni dövrü ilə müqayisədə 1422 iş çox, yəni ümumilikdə 1643 inzibati xarakterli hüquqpozma faktı aşkar edilib.
