Əhalinin bir qisminin şikayət etdiyi məsələlərdən biri, xüsusi ilə bayram qabağı ölkə daxili səyahətlərin qiymətinin normadan yüksək olmasıdır.
Məsələ ilə bağlı Ednewsa danışan iqtisadçı Cəfər İbrahimli bildirib ki, turizm sahəsində bir sıra problemlər mövcuddur. Onlardan biri də qiymət bahalaşmasıdır:
"Azərbaycanda regionlarda turizm infrastrukturu qurulan torpaqların qiyməti ucuzdursa, əsaslı investisiya üçün qoyulan vəsaitlər Bakı  və digər böyük  şəhərlərdə daha ucuza başa gəldiyi halda qiymətlərin  qonşu ölkələrdən belə yüksək olması  rəqabət problemini gündəmə gətirir. Rəqabət olsa qiymətlər tənzimlənər. Qonşu Türkiyənin təcrübəsinə baxmaq lazımdır. Məncə  regionlarda kifayət qədər turistik ərazilər var ki, ya dövlətin fond torpağındadı  ya bələdiyyədədir. Təyinatı üzrə ciddi istifadə edilmir. Və bu ərazilərin sahibkarlara da verilməsində ciddi problemlər mövcuddur. Birinci qanunvericilik tərəfi, ikinci isə  süni şəkildə bu məsələlərin qarşısının alınmasıdır. Məncə turistik rayonlarda bu ərazilər müəyyən edilməli və  hamısı uzun müddətli tender vasitəsi ilə sahibkarlara verilməlidir. Onsuz da o torpaqlar mənasız boş qalıb. Düşünürəm ki, qeyd etdiyim şəkildə sahibkarlara verilsə rəqabət artacaq və bu da öz növbəsində qiymətlərin ucuzlaşmasına ciddi təsir edəcəkdir."
Məsələyə turizm üzrə ekspert Əziz Şiriyev fərqli münasibət bildirib.
"Bu işin içində olan bir şəxs olaraq bütün vətəndaşlara tövsiyə edərdik ki, əgər regionlara münasib qiymətə turlar istəyirlərsə turizm şirkətlərinə müraciət etməlidilər. Yaxşı olardı ki, 1, 2, 3 günlük turlardan istifadə etsinlər. Hazırda ekonom olaraq 1 günlük turlar 18, 2 günlük turlar 69 ,3 günlük turlar 110 , 115 manatdan başlayaraq həyata keçirilir. Məsələnin ciddiyyəti ondan ibarətdir ki, bizim vətəndaşlar regionlara gedərkən ən məhşur 5 ulduzlu otellərdəqalmaq istəyirlər. Bu otellərin də qiyməti öz xərclərinə və brendlərinə görə  baha olur. Ona görə də biz daha çox 3, 4  və ya normal 5 ulduzlu otellərə müraciət etsək bunların da qiyməti fərdi şəkildə, iki nəfərlik səhər yeməyi daxil olmaqla nəqliyyatınızla getdiyiniz halda  50, 60, 80 manat civarında olur. Əgər normal şəkildə 80 manatlıq  iki nəfərə otel  götürülübsə bunun bir nəfəri 40 manatdırsa, 3 gecəsi 120 manat olacaq. Normalda çox gözəldi çünki siz xaricdə 5 ulduz brend  otellərədə çox baha qiymətdə qala bilərsiz. Ona görə də mütləq şəkildə turizm şirkətlərinə müraciət etmək lazımdır. İkinci məsələ şəxsi avtomobilinizlə gedirsinizsə mütləq münasib qiyməti olan oteldə qalmalısınız”.

Afaq