Ukraynanın Almaniyadan hərbi yardım kimi almaq istədiyi, lakin ictimaiyyətə açıqlanmayan silahların siyahısı yayımlanıb.
“EDnews” xəbər verir ki, sənədi Almaniyanın "Bild" qəzeti dərc edib.
Nəşrdə qeyd olunub ki, Almaniya Kansleri Fridrix Merts hakimiyyətə gəldikdən sonra Berlin Kiyevə yeni silah tədarükü ilə bağlı məlumatları dərc etmir. Eyni zamanda, Ukrayna da bu məlumatları açıqlamır.
Milyardlarla avro dəyərində konkret silah tələblərini əks etdirən siyahıda dörd vahid "IRIS-T" tipli yeni atəş qurğusu, orta mənzilli "IRIS-T SLM" sistemi üçün 1 500 vahid idarəolunan raket və qısa mənzilli "IRIS-T SLS" sistemi üçün 500 vahid idarəolunan raketin adı var. Bundan əlavə, Kiyev dronlara qarşı istifadə etmək üçün 200 min ədəd 40 mm-lik zenit sursatı da istəyib.
Ukraynanın istədiyi digər silah və texnikalara 200 vahid müxtəlif modifikasiyalı tırtıllı maşın, 30 vahid minatəmizləmə üçün zirehli maşın və 20-30 ədəd "WiSENT" tipli mühəndis tankı daxildir.
