Xəbər verdiyimiz kimi, bu gün Azərbaycan Yazıçılar Birliyinin yaranmasının 90 illiyidir. 

Bu münasibətlə Mətbuat Şurasının sədri, Azərbaycan Yazıçılar Birliyinin sədr müavini Rəşad Məcid Ednews-a açıqlamasında bildirdi ki, Sovet illərində yazıçılar Azərbaycan dilinin saflığının qorunmasında, mədəni tarixi irsinimizin yaşadılmasında böyük rol oynayıb. 

“Azərbaycanın bir neçə nəsil vətəndaşlarının ictimai fikrinə, düşüncəsinə təsir ediblər. Ən çətin dövrlərdə olsa belə milli irsləri, milli duyğuları yaşatmağa çalışıblar. Dəyərli bədii əsərlər uzun illər Azərbaycan xalqının yaddaşında yaşayıb. Onların düşüncəsinə təsir edib. Yazıçıların Azərbaycan müstəqilliyi ideayasının yaranmasında da misilsiz rolu var. Həm sovet dövrü, həm də müstəqillik dövründə Azərbaycan yazıçılarının göstərdiyi böyük xidmətlər dövlət tərəfindən də, xalq tərəfindən də yüksək qiymətləndirilib. İndi baxmayaraq ki, bədii əsərlərin əvvəlki təsir gücü yoxdur, yazıçıların əsərləri böyük tirajla çap olunmur. Müasir texnologiyalar bir xeyli halda bədii yazıların formasını dəyişib. Amma bu gün yenə də yazıçılar sevə-sevə oxunulur. Azərbaycanın dəyərli yazarları bu gündə mövcuddur”. 

R.Məcid qeyd etdi ki, yeni gənc nəsil Azərbaycan ədəbiyyatını ləyaqətlə daşıyacaq. Biz buna ümidliyik:
“Mən Azərbaycan Yazıçılar Birliyinin 90 illiyi münasibəti ilə başda Anar müəllim olmaqla bütün Yazıçılar Birliyinin üzvlərini təbrik edirəm. Yəqin ki, bu yaxın vaxtlarda biz Yazıçılar Birliyinin 90 illik yubileyini qeyd edəcəyik. Yazıçılar Birliyinin 90 illiyinə qonaqlar dəvət olunacaq. Bakıda yaxud da olsa bilsin Şuşada bu yubiley tədbirləri davam edəcək”.

Aynurə İsmayıl