"Bu, bizik! Azərbaycan jurnalistləri, KİV rəhbərləri!
Hamımız işğalın acısını yaşamışıq.
Məğlubiyyətin əzabı ruhumuzun sümüklərini sızlatmış, qürurumuzu məngənə kimi əzmişdi. Bura Xankəndidi! Hər şey burdan başlamışdı! O nöqtədəyik, hər şeyin başladığı və düz 10 ay bundan əvvəl bitdiyi məkandayıq!"
Ednews Musavat-a istinadən xəbər verir ki, bu fikirləri Rauf Arifoğlu bildirib.
"İllərlə məğlubiyyətin təslimiyyətə keçməməsi üçün yazdıq, danışdıq, ...çalışdıq!
Bəzən ümidsiz vuruşduq!
Yüzlərlə, minlərlə məqalələrimiz var!
Heç birində təslimiyyət yoxdu!
Məğlubiyyətlə barış yoxdu, güzəşt yoxdu!
Çağırış, inam, dirəniş, dua ...var!
Lakin son iki gündə yaşadıqlarımızı xəyal da edə bilməzdik!
Başımıza elə şeylər gəlir ki!
Xankəndidə ikinci möhtəşəm gecəni yaşayırıq!
Siz bir qrafikə baxın:
Şuşada, II Qlobal Media Forumunda iştirak edib, axşamları Xankəndinə dönürük!
...Cıdır düzündən buralara necə həsrətlə baxırdıq!
Nə zamanmı?
Düz 1 il öncə, bu gün!
Şuşadan canlı yayın verib, kamera ilə Xankəndini yaxınlaşdırıb: "Gələn il bu zaman Xankəndidən canlı yayın, reportaj edəcəm", söylədiyim oldu!
O lent qalır...
Efirə qatılan soydaşlarımdan çat bölümünə "inşallah" yazan da oldu, inanmayan da, söyən də...
Son iki gündə durmadan paylaşım edirəm!
Xankəndini indi kamera ilə yaxınlaşdırmırıq, küçələri ilə gəzib, hər şeyi çəkirik!
Axşamları maşınlarımıza minib, Şuşadan enirik şəhərə!
Səhərləri Xankəndidən Şuşaya qalxırıq!
Həm enəndə, həm qalxanda UCALIRIQ!
Fərəhimiz bütün yüklərimizi unutdurur!
Xankəndi heç zaman indiki kimi bizim olmayıb!
Heç sovetlər dövründə də!
Bunun xoşbəxtliyini yaşayırıq.
Hər şeyi unutmuşuq!
Xankəndini yaşayırıq!"
