Beynəlxalq Avrasiya Mətbuat Fondu Kanadanın baş naziri, Liberal Partiyanın lideri Mark Karninin 24 apreldə qondarma erməni soyqırımının 110-cu ildönümü ilə bağlı səsləndirdiyi fikirləri kəskin tənqid edən bəyanat yayımlayıb. BAMF prezidenti Umud Mirzəyevin imzaladığı bəyanatda Karninin səsləndirdiyi fikirlərin əsassız və qərəzli olduğu və bütövlükdə bu tipli çıxışların regionda mümkün sülhə birbaşa təhdid olması öz əksini tapıb.

Bəyanatın tam mətni:

“24 Aprel 2025-ci il tarixində Kanadanın Baş naziri və Liberal Partiyanın lideri Mark Karni tərəfindən Azərbaycan və Ermənistan arasında baş verənlərlə bağlı səsləndirilmiş əsassız və tarixi reallıqlardan uzaq açıqlama regionda davam edən sülh təşəbbüslərinə və beynəlxalq hüququn prinsiplərinə açıq hörmətsizlikdir. Biz, Beynəlxalq Avrasiya Mətbuat Fondu olaraq, bu cür təxribat xarakterli və birtərəfli bəyanatları qətiyyətlə pisləyir, bu tip fikirləri Cənubi Qafqazda yeni gərginliklərə zəmin yarada biləcək təhlükəli addımlar kimi qiymətləndiririk.

Cənab Karninin qeyd etdiyi "zorla köçürülmə" ifadəsi qətiyyən reallıqlarla üst-üstə düşmür. 2023-cü ildə Azərbaycanın Qarabağ bölgəsini könüllü şəkildə tərk edən ermənilər heç bir zorakılığa və ya təzyiqə məruz qalmamış, əksinə, Azərbaycan dövləti tərəfindən onlara humanitar dəstək göstərilmişdir. BMT və digər beynəlxalq təşkilatların nümayəndələri də bölgədə heç bir zorakılıq halının qeydə alınmadığını təsdiqləmişdir.

Ancaq, son 30 il ərzində Ermənistanın işğal siyasəti nəticəsində bir milyondan artıq azərbaycanlı öz doğma torpaqlarından vəhşicəsinə qovulmuş, qətlə yetirilmiş, kənd və şəhərləri viran edilmiş, qəbiristanlıqları dağıdılmış, mədəni irsləri məhv edilmişdir. Ötən əsrdə Azərbaycanlılar bir neçə dəfə, son olaraq 1988-1989-cu illərdə isə tamamilə indiki Ermənistan ərazisindən (doğma torpaqlarından) deportasiya olunublar. Uzun illər doğma kəndi, evi işğal altında olan, dağıdılan və bu münaqişədən əziyyət çəkən bir milyona yaxın azərbaycanlı qaçqından biri kimi cənab Karniyə xatırlatmaq istəyirik: sülh, tarixi saxtalaşdırmaqla deyil, ədalətə və obyektivliyə əsaslanmaqla qurula bilər.

Azərbaycan bu gün sülh sazişinin imzalanması üçün konkret və konstruktiv addımlar atır. Ermənistan isə hələ də revanşist ritorikadan əl çəkmir. Belə bir həssas dövrdə, Kanada kimi bir ölkənin baş nazirindən gözlənilən birtərəfli və emosional çıxışlar deyil, regionda dayanıqlı sülhə dəstək verəcək ədalətli və balanslı mövqe nümayiş etdirməkdir.

Beynəlxalq Avrasiya Mətbuat Fondu 30 ildən artıqdır ki, bölgədə sülh və əməkdaşlığın təşviqi üçün çalışan beynəlxalq qeyri-hökumət təşkilatı olaraq, bu tip məsuliyyətsiz bəyanatları kəskin şəkildə qınayır və sülhə xələl gətirə biləcək istənilən addımlara qarşı çıxış etməyə davam edəcəyini bildirir.”

Qeyd edək ki, ingilis dilində imzalanan bəyanat Kanada baş nazirinin ofisinə göndərilib.