“Buraya toplaşan hər birimiz daha müsbət gələcək üçün, Azərbaycan xalqı üçün daha əzmlə birgə səy göstəririk”.

EDnews xəbər verir ki, bu sözləri işğaldan azad edilən ərazilərdə səfərdə olan dünya səyyahlarından biri – ABŞ-dan olan səyyah Basant Sadasivan Cəbrayılda jurnalistlərə açıqlamasında deyib. O, daha sonra aşkarlanan minaların partladılaraq məhv edilməsindən də danışıb. O bildirib ki, ərazilərin minalardan təmizlənməsi Azərbaycan tarixindəki mənfi səhifəni silməyə kömək edəcək mühüm elementdir:

“Mənim arxamda gördüyünüz sahədə münaqişənin davam etdiyi illər ərzində minlərlə minalar basdırılıb. Bu, mənim üçün çox önəmli hadisədir. Belə ki, bu proses Azərbaycan tarixindəki mənfi səhifəni silməyə kömək edəcək mühüm elementdir. O cümlədən də, mən düşünürəm ki, bu əraziləri insanların məskunlaşması üçün daha təhlükəsiz edəcək. Bununla da insanlar gəlib burada xoşbəxt yaşaya biləcək”.

Qeyd edək ki, “NomadMania” səyyah klubunun təşəbbüsü ilə gerçəkləşən səfərdə dünyanın 30 ölkəsinin - ABŞ, Britaniya, Belçika, Almaniya, İsveçrə, Polşa, Niderland, Fransa, Braziliya, Mərakeş, Danimarka, Çili, Portuqaliya, Sierra Leone, Ruanda, Suriya, Hindistan, Serbiya, Yunanıstan, Albaniya, Türkiyə, Slovakiya, Sinqapur, İtaliya, İspaniya, İran, Kamerun, Çin, Avstraliya və Yeni Zelandiyanın səyyah elitasında yer alan nüfuzlu beynəlxalq səyahətçiləri iştirak edir. Heyət 3 gün ərzində Qarabağda və Şərqi Zəngəzurda olacaq. Onlar aparılan nəhəng bərpa və quruculuq işlərini, minatəmizləmə fəaliyyətini, Ermənistan tərəfindən işğal dövründə törədilmiş vəhşilikləri, dağıntıları müşahidə edir.

Fatimə Şükürova // EDnews