Noyabrın 20-də Qətərdə start götürəcək dünya çempionatına xərclənən vəsaitin dəqiq qiymətini müəyyən etmək çətinləşib. Aparılan hesablamalara görə, Qətərdə keçiriləcək Dünya Kuboku 1930-cu ildən bəri keçirilən yarışmalar içində ən bahalı yarış olacaq. Turnirə xərclənən vəsait 21 turnirə xərclənən məbləğə bərabər olduğu ehtimal edilir.
Ednews xəbər verir ki, mütəxəssislər qrupunun hesablamalarına, eləcə də mətbuata verilən məlumata görə, Qətərdə keçiriləcək dünya çempionatının xərcləri iki yüz milyard dollar həddini keçəcək. Hətta ehtimal olunur ki, bu rəqəmlərdə artım baş versin.
Günümüzə qədər keçirilən ən bahalı Dünya Kuboku yarışma siyahısında 2014-cü ildə Braziliyada keçirilən dünya çempionatı 1-ci, 2-ci yerdə isə 2018-ci ildə Rusiyada keçirilən dünya çempionatı qərarlaşıb. Bu iki yarışmanın birlikdə xərci 15 milyard dollardan az olub.
Şeffild Hallam Universitetinin müəllimi və futbolun maliyyəsi üzrə ekspert Dan Plumley bildirib ki, Qətər 2010-cu ildə “2022-ci il dünya çempionatına ev sahibliyi” hüququ qazananda, ilkin hesablamalara görə, potensial xərc 65 milyard dollara çatacaqdı. O, əlavə edib ki, bəzi son hesablamalar xərclərin 200 milyard dolları keçəcəyi ehtimalını göstərir.
Amerikanın "Front Office Sports" şirkətinin hesablamalarına görə, Qətərdə keçirilən dünya çempionatının dəyəri 220 milyard dollara çata biləcəyini göstərilib. Digər tərəfdən isə, Dünya Çempionatının Təşkilat Komitəsinin baş katibi Həsən Əl-Təvadi, Körfəz ölkəsinə turnirə ev sahibliyi etmək hüququ verildikdən sonra qurulan infrastruktur xərclərinin 200 milyard dolları keçəcəyini bəyan edib.
Ümumi dəyərin hesablanmasındakı bu uyğunsuzluq və ya qeyri-dəqiqlik onunla bağlıdır ki, Qətər hökumətinin 2010-cu ildən bəri xərclədiyi milyardlarla hesablanmış pulun böyük hissəsi futbolla bağlı olmayan infrastrukturun yaradılmasına xərcləndiyidir. Paytaxt Dohada beynəlxalq hava limanı, yeni yollar, eləcə də yüzə yaxın otelin tikintisi bunun əyani sübutudur. Bu investisiyaların ən böyük hissəsi “Qatar Milli Baxışı 2030” layihəsinin icrası çərçivəsində həyata keçirilir.
Rəna Mürşüd