Minifutbol üzrə dünya çempionatında növbəti mərhələnin təqvimi dəqiqləşib. Bakıda keçirilən turnirdə Azərbaycan millisi azarkeşlərini növbəti həyəcanlı qarşılaşmaya səsləyir. İngiltərə yığması ilə keçiriləcək 1/4 final oyununun dəqiq vaxtı artıq bəllidir.

EDnews xəbər verir ki, bu möhtəşəm qarşılaşma mayın 29-da, Milli Gimnastika Arenasında, saat 20:30-da start götürəcək. Ev sahibi kimi çıxış edən Azərbaycan millisi mötəbər yarışda yarımfinala yüksəlmək üçün meydanda əzmlə mübarizə aparacaq.

Günün ilk 1/4 final qarşılaşması isə saat 17:30-da başlayacaq. Bu oyunda Macarıstan və Mavritaniya komandaları üz-üzə gələcək. Hər iki yığma son dərəcə gərgin və maraqlı oyun vəd edir.

Qeyd edək ki, digər iki 1/4 final oyununun cütlükləri hələ tam müəyyənləşməyib. Bu barədə qərar mayın 28-də keçiriləcək 1/8 final mərhələsinin qalan dörd oyunu başa çatdıqdan sonra veriləcək. Qarşıdan gələn bu görüşlər həm turnirin gedişatını, həm də favoritlərin kim olacağını müəyyən edəcək.

Mini-futbol azarkeşlərini bu oyunda gərgin anlar, möhtəşəm qollar və həyəcan dolu epizodlar gözləyir. Azərbaycanın öz meydanında tarix yazması üçün önəmli bir fürsət yaranıb.

Fatima Şükürova // EDnews