Macarıstanın xarici işlər naziri Peter Siyarto Avropa İttifaqının Rusiyaya qarşı sanksiyalarının uzadılmasını və Ukraynaya maliyyə yardımının ayrılmasını bloklamaq niyyətini bir daha təkrarlayıb. O, həmçinin Brüsselin ABŞ və Rusiya arasında mümkün "sülh razılaşmasını" əngəlləməsinə qarşı çıxacağını vurğulayıb.
“EDnews” xəbər verir ki, bu barədə o, fevralın 24-də səhər saatlarında, Aİ Xarici İşlər Şurasının iclasından əvvəl Facebook səhifəsində yazıb.
Siyartonun fikrincə, hazırda sülh üçün bir imkan yaranıb və Macarıstanın mövqeyi hər zaman ondan ibarət olub ki, müharibəyə yalnız ABŞ və Rusiya arasında əldə olunacaq razılaşma son qoya bilər.
O, ABŞ və Rusiya arasında sülh və qarşılıqlı münasibətlərin nizamlanması ilə bağlı danışıqların başlanmasını alqışladığını bildirib.
"Bizim fundamental marağımız bu danışıqların uğurla başa çatmasıdır. Məhz buna görə də bu razılaşmanı bloklamağa çalışan müharibə tərəfdarı avropalı liberalların planlarından narahatıq", – deyə o qeyd edib.
"Məhz buna görə də biz Brüsselin və müharibə tərəfdarı avropalıların ABŞ və Rusiya arasındakı sülh razılaşmasını bloklamasına imkan verməmək üçün əlimizdən gələni edəcəyik", – Siyarto vurğulayıb.
O, Aİ xarici işlər nazirlərinin görüşü zamanı gözlədiyi təzyiqlərə qarşı mübarizə aparacağını bildirib.
"Üç il ərzində bu təzyiqlərə qarşı dayandıq, üç il ərzində bizi onların hərbi siyasətinə sürükləmək cəhdlərinə müqavimət göstərdik, indi də buna davam edəcəyik!" – deyə o vəd edib.
"Biz fiziki şəxslərə qarşı sanksiya rejiminin tələsik genişləndirilməsinə razı olmayacağıq, biz on milyardlarla avronun silah tədarükünə xərclənməsinə razı olmayacağıq və təhlükəsizlik zəmanətləri məsələsində yalnız Ukraynanın yox, həm də macarların təhlükəsizliyini müzakirəyə çıxaracağıq", – Siyarto əlavə edib.
Xatırladaq ki, Aİ-nin baş diplomatı Kaja Kallas Xarici İşlər Şurasının iclası öncəsi Rusiyaya qarşı 16-cı sanksiya paketinin və Ukraynaya yeni hərbi yardım təşəbbüsünün təsdiqlənə biləcəyini açıqlayıb.
O, həmçinin fevralın 25-də ABŞ-a səfər edəcəyini və orada ABŞ-ın dövlət katibi Marko Rubio ilə Aİ-nin və Ukraynanın gələcək sülh danışıqlarında rolunu müzakirə edəcəyini bildirib.
Ötən həftə Macarıstanın xarici işlər naziri Peter Siyarto Aİ-nin 2400-dən çox şəxs və təşkilata, o cümlədən Rusiya prezidenti Vladimir Putin və xarici işlər naziri Sergey Lavrova qarşı sanksiyaları uzatmaq cəhdinə qarşı çıxacağını vəd etmişdi.
