ABŞ şübhəli şəxs kimi bilinən  qruplaşma üzvünü Salvadora deportasiya etdi.

ABŞ Dövlət Departamentinin verdiyi məlumata görə, Tramp administrasiyası, Salvadora şübhəli şəxs kimi bilinən 17 qruplaşma üzvünü deportasiya edib.

ABŞ Dövlət Katibi Marko Rubio bəyanatında, deportasiya edilən şəxslərin Tren de Aragua və MS-13 kimi tanınmış cinayətkar qrupların üzvləri olduğunu açıqlayıb. Salvador rəsmiləri isə BBC-yə verdikləri məlumatda, deportasiya edilənlər arasında həm venesuelalıların, həm də salvadorluların olduğunu bildiriblər.

Bu ayın əvvəlində bir məhkəmə, 1798-ci il tarixli “Yad Düşmənlər Qanunu” əsasında həyata keçirilən deportasiyaların dayandırılması barədə qərar qəbul edib. Bu qanun yalnız müharibə dövründə tətbiq edilib. Lakin, deportasiya edilən 17 nəfərin hansı qanuna əsaslanaraq deportasiya edildiyi hələ də qeyri-müəyyəndir.

Rubio bəyanatında deportasiya edilən şəxslərin "qatillər və təcavüzkarlar" olduğunu bildirdi, amma onların adları, təqsirli olduğu iddia olunan cinayətlər və ya məhkəmə qərarları barədə heç bir məlumat vermədi.

El Salvador prezidenti Nayib Bukele, X platformasında redaktə edilmiş bir video paylaşaraq, deportasiya edilən şəxslərin təyyarədən endirilib həbsxanaya yerləşdirilmələrini göstərdi. Bukele, videoya əlavə etdiyi şərhində, "Bütün bu şəxslər qatillər və yüksək təhlükəli cinayətkarlardır, o cümlədən altı uşağa təcavüz ediblər," yazdı.Amma  yenə də heç bir ad və ya iddia edilən cinayətlər barədə konkret məlumat vermədi. O, əməliyyatın məqsədini terrorizm və təşkilatlanmış cinayətkarlığa qarşı mübarizədə daha bir mühüm addım kimi qiymətləndirdi.

El Salvador, deportasiya edilən şəxslərin qarşılığında 6 milyon ABŞ dolları (4.62 milyon funt) alacaq. Lakin, əvvəlcə supermax həbsxanasına göndərilən bəzi şəxslərin ailələri, onların heç bir qruplaşmaya aid olmadığını iddia edərək bu məlumatı təkzib ediblər.

Bu ayın əvvəlində, Tramp Yad Düşmənlər Qanununa əsaslanaraq 100-dən çox venesuelalıyı ABŞ-dan deportasiya edib. Bunun ardından, “Amerika Vətəndaş Azadlıqları Birliyi” (ACLU) və “Demokratiya İrəliləyir” kimi təşkilatlar, administrasiyanın miqrantlara hüquqi prosedurları təmin etmədən deportasiya etdiyi iddiaları ilə məhkəməyə müraciət ediblər.

15 mart tarixində keçirilən məhkəmə iclasında, Vaşinqton DC-nin ən yüksək federal hakimi Ceyms Boasberq, Yad Düşmənlər Qanununun tətbiqinə müvəqqəti olaraq məhdudiyyət qoydu və havada olan deportasiya təyyarələrinin geri qaytarılmasına qərar verdi. Buna baxmayaraq, deportasiyalar davam edib. Məsələnin növbəti iclası isə cümə günü keçiriləcək.

Mədinə Məmmədova//EDnews