"Avropalılar dərk etmirlər ki, onların məsuliyyətsiz hərəkətləri İkinci Dünya müharibəsindən sonra ən böyük silahlı münaqişəyə səbəb ola bilər".

“EDnews” xəbər verir ki, bu barədə Rusiya XİN-in mətbuat katibi Mariya Zaxarova brifinqdə bildirib.

"Brüsseldə hesab edirlər ki, Volodimir Zelenskinin mövqelərinin güclənməsinə "istəklilər koalisiyası" adlanan qurum kömək edəcək. Bu, Ukraynada münaqişədə birbaşa iştirak etməyə səbirsizlənən Şimali Atlantika alyansının üzv ölkələrinin ən radikal hissəsidir", - deyə o bildirib.

Zaxarova qeyd edib ki, onlar sammitlər təşkil edirlər, Baş Qərargah rəislərinin görüşlərini çağırırlar və eyni zamanda, dərk etmirlər ki, onların məsuliyyətsiz hərəkətləri nüvə dövlətlərinin iştirakı ilə İkinci Dünya müharibəsindən sonra ən böyük silahlı münaqişəyə səbəb ola bilər.

Rusiya XİN-in rəsmi nümayəndəsinin sözlərinə görə, əsas təşviqatçılar Böyük Britaniya və prezident Emmanuel Makronun rəhbərlik etdiyi Fransadır.

Xatırladaq ki, Parisdə martın 27-də "istəklilər koalisiyası"nın sammiti keçirilib, burada təxminən 30 ölkənin nümayəndələri Ukrayna münaqişəsi başa çatdıqdan sonra Kiyev üçün mümkün təhlükəsizlik zəmanətlərini müzakirə ediblər. Əsas mövzulardan biri Ukrayna ərazisində hərbi kontingentin potensial yerləşdirilməsi olub. ABŞ bu sammitdə iştirak etməyib.